港超聯　北上落班？陳俊樂：我未畢業呀！

自徐宏傑離隊北上轉投中甲梅州客家後，多名在港超中表現突出的年輕球員，都盛傳獲國內球會的球員經紀或球探相中，有望成為新一批北漂港將，被傳得熱哄哄的除標準流浪卓耀國外，還有效力和富大埔的兩名大港腳陳俊樂和黃威。

對於有指「堅爸」阻頭阻勢，不讓「乖仔」陳俊樂離隊，以保持和富大埔之實力和爭霸本錢，一向沉默寡言的「樂仔」即帶點激動地回應：「點解咁講呀？梗係唔係咁啦！成件事根本唔係出面傳咁，無錯係有啲國內嘅Agent問過我，問我有冇興趣上去，我都好有禮貌咁回覆有興趣，但唔係依家！我邊讀邊踢咁耐，捱得咁辛苦為咩啫？都係想完成到個大學學位，完埋呢個學期就搞掂喇，我點會依家走咗去？況且大家都識講『堅Sir』係我哋『堅爸』吖嘛，我哋嘅關係可能比大家認識嘅更加深，佢點會唔想我好先？我諗佢係最想我哋幾個出到去踢波嘅人添呀！最緊要係到呢一刻為止，都冇一間球會正式開過條件畀我，正式十劃都未有一撇。」

情況跟「樂仔」差不多的還有黃威，他強調到目前為止，都未收過任何經紀或球會開出的條件，他謂：「唔同『傑仔』佢哋喎，佢哋真係有經紀落嚟，入埋場睇佢哋比賽，再傾埋條件。我同『樂仔』一樣，係好多經紀問過想唔想上去，我都係答有呀，傾吓囉！但都無正式畀過offer我，唔係『冇得傾』，根本係『冇傾過』。（累「堅Sir」畀人話喎！）咁就真係唔好意思喇，Sorry囉，哈！哈！」