亞冠外　東方主場勇戰惜敗出局

周二（23日）晚假旺角大球場上演的亞洲聯賽冠軍盃外圍賽第二圈，由東方足球隊擺下擂台陣迎戰越南球隊清化。主場出擊的東方開賽初一直強攻，更由勞高打開紀錄，惟之後先失12碼，易邊後更被黃廷松省入三粒，終於3305名球迷見證下不敵清化，無緣躋身下一圈賽事。

今場為李健和「和哥」掌帥印後的首仗，賽前誓言絕不留力，開賽初段東方表現積極，一直於前場施壓，鞠盈智5分鐘左路角球開出，被前柱的吳煌盛化解。勞高11分鐘右路底線附近斬中，惟門前無人接應，攻勢告一段落。東方連番攻門終於25分鐘修成正果，張健峰左路罰球開出，首嚐亞冠滋味的勞高門前一頂入網，為東方打開紀錄。

東方短短領先6分鐘便失守，新加盟的守衞井川祐輔門前犯手球，球證即時出示黃牌並直指12碼點。這個極刑由菲爾主射一抽掛網，為球隊追成1比1平手。補時階段曾錦濤接應李康廉傳中，遠柱頂彈地波，同樣過不到陳寶玉十指關，兩軍踢成1比1完上半場。

清化易邊後換入前鋒黃廷松加強火力，他一落場即錯失黃金機會，門前接應武明俊傳中惜「躂Q」被葉鴻輝救到。但這位前鋒隨即發威，分別於58分鐘及60分鐘接應黎文勝傳送，三分鐘內連入兩粒，拉開比數。而主隊於63分鐘博得12碼，由洛迪古斯主射破網。他們於81分鐘得罰球機會，由勞高主射，可惜僅僅中柱。而清化戰至補時階段再有黃廷松把握敵衞解圍不遠射入最後一球，為清化奠定4比2勝局，躋身下一圈賽事。

賽後「和哥」認為一眾球員今仗表現積極：「雖然輸波，但起碼畀我見到球員無因為司徒文俊嘅離職而影響到比賽心態，今日見到佢哋行出嚟都係好想贏返場波，無奈對手實力真係強。今日我哋14個球員個個都Ok，唔理佢出場時間長短，個個都係100%付岀晒！見到佢哋個個心態都好好，我相信球隊之後嘅比賽會更加強！」

對於球隊3分鐘內慘失兩球，「和哥」則表示情況難以預計：「其實無辦法，手球省落去大家都唔想。對方反擊真係太快，我哋有球員力追，但呢啲情況真係估計唔到。角球成隊壓晒上去預左有呢個情況，其實都有機會追返嘅，但踢波就係咁樣囉！」