英聯盃　曼城僅勝入決賽　英冠仔要畀Like

即睇全場入球片段：http://bit.ly/2F8CBFJ　

英超一哥曼城，今季於哥迪奧拿帶領下有幾超班，球迷個個有眼睇；但兩次面對英冠仔布里斯托城，曼城都係僅勝，唔係佢哋踢得曳，而係布城表現一流！英聯盃4強首回合作客曼城，布城僅輸1:2，周二深夜次回合回歸主場，縱然畀利萊辛尼及阿古路攻破大門，但主隊完全冇放棄，完場前追成2:2平手。雖然最後始終輸2:3，但一定要畀Like呢隊英冠仔。曼城2回合計贏5:3殺入決賽，2月尾就知哥帥，能否取得帶領藍月亮後首個錦標。

布里斯托城絕對係本屆英聯盃神奇球隊，遙身一變成英超球隊殺手，淘汰屈福特、史篤城及水晶宮後，8強仲一舉擊敗曼聯，去到4強「打大佬」對曼城，布城一樣保持水準，首回合作客僅輸1:2。次回合上半場布城亦表現極佳，唔係完半場前輸孤寒，畀貝拿度施華迫走皮球，辛尼亦冇機會近門抽射建功。辛尼入波後「殊」主隊球迷，又做出叫敵對擁躉冷靜嘅動作，賽後被插冇品。

換邊後奇雲迪布尼妙傳阿古路，後者推順射遠柱入網，曼城兩回合領先到4:1，晉級大局已定。不過布城冇放棄，大舉進攻壓住強敵，先憑馬龍柏克頭槌破蛋，並於完場前憑芬列治近門射入扳平，為賽事掀起小高潮。可惜布城已耗盡所有氣力，補時階段辛尼左路地波傳中，迪布尼近門射入，一腳送曼城入決賽。

曼城將於2月25號，同阿仙奴或車路士於溫布萊球場爭冠軍，呢次亦係哥帥年代嘅藍月亮首個決賽。曼城本季大勇，目標係爭取成為英超、歐聯、英足盃及英聯盃四冠王。

即上英超刨績王：http://win.on.cc/epl　

東網體育FB同你追實體壇每個精彩時刻！

http://bit.ly/2ecTF2A