【港超專版】達Sir點只教波咁簡單！？

港超最年輕主帥曾昭達「達Sir」，擔任陽光元朗主教練的他，其實還有另一個身分，也就是一位……教練。定少少，不是「玩嘢」！所指的是「達Sir」除執教陽光元朗之外，才28歲的他亦是香港大學足球代表隊的教練。

球員出身的曾昭達，2016年在元朗完成職業球員生涯最後一個球季後，便接替馮凱文執起該地區球隊的教鞭。與此同時，在恩師陳曉明的引薦下，接掌了HKU校隊的帥印。「眨眼原來已經係年半前嘅事，我自細就好鍾意挑戰自己，成日會訂立一啲目標畀自己去完成。教元朗之前，我喺中學學界帶過隊，亦教過女子隊，帶大學球隊可以話係另一個層次，情況就同我當日決定掛靴去帶職業隊一樣。」「達Sir」回憶道。

雖然同樣是教練，但此「教練」和彼「教練」卻大有分別，「達Sir」解釋，身為HKU的教練，除着重球員的技術和球隊戰術之外，還要關顧許多足球以外的範疇，例如球員的心理、作息、紀律和成長等等。「同樣工作元朗都會有，但因為球員本身有一定技術水平，好多球員好波過我，所以會集中多啲戰術部署。仲要參與管理、安排同協調工作，性質好唔同。」「達Sir」表示。

令球員成長最大成就

在兩個「教練」的角色上，怎樣界定自己成功與否？「達Sir」說：「都有好大分別，教元朗我最想畀到球員合適發揮平台，特別係一啲肯付出嘅球員，等佢哋可以發光發熱，出到名、攞到獎，甚至畀大球會撬走；至於教港大，發掘到有潛質球員固然好，但如果可以令球員成長，於社交、待人接物、生活細節都有改進，都係好大成就！」

談到得着，一向「吹得」的「達Sir」，更說到眉飛色舞：「教元朗呢年半，我好開心有一班目標一致，好簡單嘅『兄弟』可以一齊奮鬥；部署成功同見證球員成長，滿足感好大。至於教港大呢年半，同樣非常開心，因為見到一班『囝囝』不斷成長，又保持到對足球嘅熱誠同決心，單純咁去追求踢波樂趣，一切都係珍貴嘅收穫。」

自我提升惠及眾人

畢業於城大會計系的「達Sir」，雖然道出了兩個「教練」很多不同之處，但其實亦有共同點，就是本身都要不斷求進，不能原地踏步：「我唔鍾意停留於一個層面太耐、太安逸就會失去動力，所以我上年已經去讀A牌，希望自己可以不斷提升層次，自己有益自然對球員有幫助。身為教練可以Upgrade到，咁對元朗或者港大球員都係好事呀！係唔係？」

銀牌爭霸同李健和師徒對決

陽光元朗明天（27日）便會在「高級組銀牌」冠軍戰，與東方龍獅爭霸，這場除了是曾昭達執教該區隊以來首場決賽外，亦是「達Sir」與「和哥」李健和的「師徒對決」。

很多球迷和球圈中人都知道，曾昭達一直被稱為前足總技術總監陳曉明的高足，但其實恩師豈止一個？「達Sir」在2007年球季加盟華家堡前，一直都是港青代表，與曾至孝、歐陽耀冲和曾錦濤等同期，長時間都在當時的港青教練李健和麾下出賽。13年前，「達Sir」和「和哥」這對師徒便為香港U15勇奪獅城盃：「我職業球員生涯雖然成就好一般，但都好慶幸跟過好多好教練，『陳Sir』同『和哥』都教咗我好多嘢。早前元朗同澳門代表隊拍跳就對咗『陳Sir』，嚟緊就要同『和哥』爭冠軍，無論最後結果係點，呢場波都會好難忘。」