高級銀牌　陽光元朗堅神奇　達Sir：好夢幻

陽光元朗今屆高級銀牌「神奇之旅」先後跟和富大埔及傑志激戰120分鐘後，分別以4比2及3比1淘汰兩支勁旅躋身周六（27日）的決賽，最終以3比0擊敗東方龍獅奪冠。球隊主帥曾昭達「達Sir」表現激動，賽後訪問時講到奪冠更眼泛淚光：「真係好夢幻！贏傑志已經好夢幻，今日贏埋拎冠軍非常⋯⋯我都唔知點講！成件事好天馬行空，我有諗過嘅，但係去到呢刻我都唔敢相信！」

「達Sir」16年才展開其教練生涯，短短兩年已助球隊奪得高級銀牌冠軍，現年只有28歲他表示從來都沒想過短時間內能帶領球隊奪冠：「從來無諗過！我覺得自己係一個好好彩嘅人！有一班好好嘅球員、一間好好嘅球會、一個好好嘅平台畀我發揮，仲有好重要嘅師父幫咗我！呢個冠軍比我想像中嚟得快，坦白講做教練都嚟得好快，但係我非常開心行到呢一步！絕對無後悔！」

陽光元朗一向起用不少本地年輕球員，「達Sir」希望以這個冠軍勉勵本地小將：「好開心我哋隊有好多華人可以喺決賽上陣，每一個人都需要機會，包括我自己都係！唔好抹殺年輕人嘅毅力、佢哋嘅魄力，甚至係佢哋唔怕死嘅精神！有時真係可以放手畀機會佢哋試吓！唔試過唔會知得唔得！」