香港隊　郭嘉諾：教咩隊都畀足100%！

隨着金判坤於去年底辭去香港隊主教練一職，令原本擔任香港青年代表隊教練的郭嘉諾（Kenneth），獲委派領軍出戰省港盃。父親是南華一代名將郭錦洪，這位今季協助港隊贏得港澳埠際賽及省港盃的少帥，自小受到足球薰陶，他表示無論將來自己處於任何崗位，都希望感染其他教練，燃點球圈上下對足球的熱誠，讓港足發展更上一層樓！

作為「名將之後」，郭嘉諾年幼時亦跟香港不少足球小將一樣，面對着學業與足球的兩難局面，「Kenneth Sir」最後認為雙管齊下才是上策：「佢（父親郭錦洪）係知名足球員，喺足球上影響我好多，由細到大都會叫我做鍾意做嘅嘢，但畢竟讀書緊要，媽咪成日同我講要讀多啲書。自己好細個就諗，點解唔可以一路踢波一路讀書呢？雖然最後我選擇咗入大學繼續讀書，但畢業後一直踢當時嘅乙組。有次本來去試腳，偶然得到港會一份工，咁就開始一路做嘢一路踢波，甚至做教練嘅生涯。」

望小將化興趣為職業

在港甲聯賽僅效力過港會的郭嘉諾，雖強調自己只曾是個業餘球員，但正因如此，他會更加體諒「半踢讀」的球員︰「當時我喺港會，以一個業餘球員身份踢職業聯賽，比職業球員更辛苦。我哋每日返工9至6，完咗即刻去練波，踢完周日90分鐘嘅賽事，職業球員第二日有得恢復，但我哋第朝一定要返公司。所以我經常跟梯隊球員講，若果覺得冇白費時間喺足球上，就試吓將興趣變成職業。」

在港會期間兼任行政、教練及球員的郭嘉諾坦言，當時工作際遇不錯，覺得自己可以為香港足球做多點事，便毅然辭職轉任職業足球教練，到現在亦不時為本地教練舉行分享會，他認為教練跟球員的培訓同等重要︰「作為香港青年隊教練，一兩個禮拜先可能見到球員一次，好難淨係靠我哋去改變一啲嘢，香港如果想由梯隊開始爭取好成績的話，係需要所有教練一齊去做同一樣嘢。教練培訓好重要，請一個教練就改變到全香港嘅足球，係完全冇可能。我哋每個教練都應該互相感染大家，一齊為香港足球出力。」

為港足出力 不分崗位大小

無論「Kenneth Sir」今夏率領香港隊U17迎戰曼聯青年軍的表演賽，抑或是最近帶領「B隊」出戰港澳埠際賽及省港盃，均獲得外界不俗的評價，他認為球員表現源於他們的拚博精神︰「我帶過咁多隊波；B隊又好，細嘅都好，佢哋都好團結同好肯去搏。（港隊U17）對曼聯（U16）嗰場，實力、速度、體能都唔及人哋，但佢哋明白喺香港好多人支持港隊，我叫佢哋當世界盃咁踢，所以你見班小將好團結，因為佢哋好想踢好呢場波。」

問到會否希望「擔正」執教港隊，「Kenneth Sir」傾向順其自然，並強調需要大家齊心協力︰「我嚟到足總做嘢，擺低咗自己，從來冇講過要咩職位，無論邊個崗位，我都繼續去推動大家對足球嘅熱誠，犧牲自己去團結大家。只不過如果你需要我的話，我一定會去做，畀足100%，仲會要求所有球員、球迷一齊去畀足100%！」