陳國雄憶述：仇志強要波要人要埋姿勢分

「仇志強救波好，姿勢又靚，出迎封單刀更是一絕，近年香港球壇已經很難見到這樣出色的門將了‧‧‧‧‧‧」南華名宿陳國雄憶述這位昔日同袍時，不無感慨地道。

對於仇志強撒手人寰，陳國雄覺得惋惜之餘，更回憶起上世紀七十年代與「仇仔」的合作點滴：「佢嘅把關手法非常正宗，飛身撲救唔只要求接到個波，更要講求姿勢好睇，連姿勢分都攞埋，所以好多人特別鍾意睇佢打波。除咗撲波一流，仇志強出迎封單刀亦好有霸氣，可能有練過功夫嘅關係，佢動作靈活，又識保護自己，往往腳膝一齊去晒，唔少前鋒都怕咗佢。而且佢另一個優點係接波之後，會馬上策動反擊，好似我係踢中場嘅，即刻就可以轉身走位，佢掟出嚟啲波好易攞，真係個好好夾嘅隊友。放眼依家香港，冇乜龍門做得到。」

「國雄」更透露仇志強一個練波秘密：「佢從來只會參加晚練，晨操一定唔出現，因為佢認為自己一定要休息夠先得，但係佢每次練波都會去盡，當年南華會個場好硬，仇志強事前會先親自淋水，令場地軟一啲，然後就操到足，吓吓飛、吓吓都撻‧‧‧‧‧‧」一代鋼門就是這樣長期保持高水準。

至於另一南華名宿黃文偉，對這名昔日隊友的離世亦感到可惜，嘆息這是人生必經之路，並稱仇志強實非太大年紀。而他在港比賽期間，上中下三路撲救都極為出色，因而令到不少港人學做守門員，1972年坐直升機由花墟球場趕赴大球場比賽，更是令人津津樂道。