【港超專版】跌得最低變得更強‧吳偉超

「不是看到希望才去堅持，而是堅持了才會有希望。」這句名言相信大家都耳熟能詳，但真正做到的，又有幾多人呢？東方龍獅後衞吳偉超花了13年青春，於中國球壇打滾，闖出自己一片天。2016年12月回流香港加盟東方龍獅，至今出場時間並不多，上輪聯賽後備上陣頂入加盟以來第一個入球，助球隊以3比0擊敗強敵香港飛馬。訪問當日，「超哥」多次重複上述名言，希望以此鼓勵年輕球員做好準備：「球員未必個個都係正選，你冇得踢嗰陣要更加努力！」

圖/文：陳焌鏗

「跌低」係變得更強嘅機會

踏入職業生涯尾聲，36歲的吳偉超覺得球員生涯已無憾：「得到嘅已經比我想像中多，自己盡咗最大努力，做到比初時定嘅目標好，已經冇乜遺憾。真係要講缺失的話，可能係未贏過中超冠軍，但係一個香港球員可以喺其他聯賽踢到十幾年，已經係最大嘅肯定。」一路走來，有兩場比賽至今仍深深烙印在「超哥」心中：「07年我一個失誤令球隊輸波，有一年都冇機會出場，之後好努力去加強自己。08年再對番同一個前鋒，我發揮特別好，幫助球隊贏波，自此我就知道，其實跌得最低唔係一件壞事，反而係你變得更強嘅機會。」

「啱教練口味都要有準備」

自己走過冤枉路，吳偉超希望憑藉自己的經驗，成為本地年輕球員的「人生導師」，幫助他們成長：「你間中踢得好，我唔會畀掌聲你，因為我覺得可以更加好，但你踢得唔好、灰心時，我會鼓勵你，提高對自己嘅要求，慢慢進步。」面對現今眾多入籍兵，「超哥」寄語年輕球員要先做好自己：「唔好成日覺得有入籍兵就冇機會，入籍兵都要等7年時間，如果你提升到自己，無論你對咩對手，你都可以贏佢。」他還打趣說：「好似食嘢咁，每個人都有唔同口味，呢個教練冇畀機會你，你只可以做好自己等待機會，如果啱下一個教練口味，畀機會你，但你一路冇準備、上場冇表現嘅話，其實任何一個教練，對你嚟講都一樣。」

訪問當日，「超哥」收操後還自發與謝敏榮一同鍛煉體能和頭槌，年齡沒有淋熄他追求進步的火燄，對於外間批評聲音，他一笑置之：「就算你做咩都會有人讚有人批評，唔需要太上心。就同自己講，你永遠都有做得更好嘅地方。」

感激超嫂撐足13年

吳偉超足球生涯在上海登上高峰，亦在這片福地遇上另一半。與太太度過13載，吳偉超感激身邊人體諒：「喺香港做球員嘅女朋友、老婆，可能無乜特別，因為都係喺香港。但喺其他地方就比較辛苦，球員成日要走嚟走去，見面時間比較少，但冇辦法，呢份係我職業。」

人生未必能事事如意，「超哥」幸得賢內助一直支持：「好多謝佢咁多年嚟嘅支持，無論生活、起居飲食，甚至足球上，我唔如意嗰陣，佢都鼓勵我，同我講加油。」