【港超專版】孭鑊諗過收山　聰頭火起再追夢

於歷史性的首場亞冠盃分組賽中領紅「孭鑊」兼連累球隊輸0比7……已年屆35歲的「聰頭」黃志聰，上屆在東方龍獅經歷一個「災難性」球季後，本已有「收山」念頭！不過，就係因為夢想FC教練梁志榮一句「畀啲火我」，令到在球場上信心盡失的「聰頭」決定捲土重來，並繼續以招牌式的「猛虎剷球」，再讓港超聯各隊的前鋒聞風喪膽！「聰頭」更豪言：「呢樣真！冇火，不如唔好踢！」圖、文：司徒子文

曾因球市不景氣，到了26歲才首次在港甲（淦源）亮相的黃志聰，雖然遲了起步，但卻因為「一團火」而後上「大器晚成」！不過，去年在大球會東方龍獅鮮有上陣機會，再加上亞冠盃出醜，曾令這悍將想過到此為止：「始終踢大球會，壓力就梗係大，自己又釋放唔到自己，變得愈踢愈差！亦都慶幸叫做踢過亞冠盃呢啲大型賽事，雖然結果不如預期，但都叫還晒心願……另外，都35歲人喇，又同朋友搞緊生意，有諗過就咁算罷啦！」

不過，就在「聰頭」信心跌到極低點時，反而得到今屆新組軍的夢想FC教練梁志榮招手：「其實我都仲好想踢波，但就質疑過自己仲適唔適合！而『細榮』同我講，睇中我喺球場嗰團『火』，希望我可以帶到團『火』畀班年輕球員。之後我嚟咗呢度後，可以無壓力咁去踢鍾意嘅足球，好似去番24歲前踢乙、丙組嗰陣時，隊友之間唔會收收埋埋，有嗰句講嗰句，一切都變得簡單，真係好開心！」

問到「聰頭」口中所說的「火」，他即滿有信心地道：「踢波，尤其係踢後衞就要有霸氣，一定要咁踢！行出嚟要有個勢，等對手怕咗我！畀人過咗唔緊要，返轉頭唔放棄追番！依家啲細路防守拍一拍就算，我好想講『不如返去打乒乓波』啦……我好想隊波嘅後生仔可以學識『畀啲火我』，尤其係雷文迪潛質優厚，有埋『火』就前途無限！」

夢想FC季初成績相當搶眼，惟最近有點回落，「聰頭」直言這才是正常：「以我哋咁嘅人腳，季初打得好係驚喜！不過，就係因為贏咗波有期望，就會出現壓力，令到班後生仔怕失誤而更容易失誤，就好似我以前咁。呢個係信心問題，但以我經驗只要把握到一次贏波機會，所有嘢就自自然然會返晒嚟！」

超級愛妻號想入波畀心心

黃志聰在球壇打拚超過10年，但原來仍有一個簡單心願未完成：「入波囉！咁多年嚟我都未有入過波！呢幾年老婆都有入場睇我比賽，我就好羨幕一班年輕球員，入波後整個『心心』慶祝動作畀另一半……我成日喺度諗，如果我能夠入波，成為全場焦點下畀個『心心』佢，答謝咁多年對我付出同埋生咗兩個細路，咁就真係完美！」

這位「愛妻號」球員直言經常迷失了自己，都是靠老婆喚醒重回正軌：「最初想轉做職業球員時心大心細，都係靠老婆鼓勵，話我唔踢波就只係會渾噩過日子，我先的起心肝去衝去闖……到咗上季我信心盡失時，又係佢糾正我負面思想。如果無咗Rainbow，我人生就唔會出現彩虹！」