【港超專版】遠征平壤 劉學銘想香港先入波

為爭奪2019亞洲盃出線資格，香港足球代表隊將於周二作客北韓。由於今仗為最後一輪外圍賽，香港隊非勝不可，更徵召了數名新面孔，而當中一位是23歲、效力冠忠南區、司職防守中場的劉學銘。繼省港盃後再度入選香港隊，學銘表示：「覺得好興奮又好榮幸！」 ■文：陳焌鏗

第一次入選香港隊A隊，劉學銘興奮不已：「始終都係第一次入選大港腳，之前都係入選B隊，踢省港盃、賀歲盃，甚至港澳埠際賽，今次真係入選到A隊踢亞洲盃去作客北韓，覺得好興奮又好榮幸！」首次入選便要應付晉級「生死戰」，學銘稱：「我哋都唔會有太大壓力，始終背水一戰，唔會再有空間去諗呢啲問題。」繼亞洲足協23歲以下錦標賽後再次出征北韓，「經驗豐富」的學銘放言不再擔心：「上次去嗰陣美國同北韓關係緊張，驚唔知有啲咩事發生。依家有咗第一次經驗之後，都知道個行程會係點，所以都冇上次咁緊張。」

跟前輩訓練獲益良多

雖然不怕「征韓」，惟這位23歲小伙子卻對首度入選感到有一絲擔憂：「始終教練選得我入嚟佢都覺得我可以應付得到，只要投入番個訓練咁就冇嘢。可能係因為第一次入選，自己初頭有少少緊張，之後都冇咩大問題。」

然而，香港隊陣中有多位擁有豐富經驗的球員，學銘從中亦獲益良多：「睇到佢哋作為防守球員一啲提場領導條防線嘅能力。例如作為中堅到某啲位置就唔使追落去，再提番隔籬個拍檔，一啲細節上自己都需要注意，有時可能自己大意，需要佢哋提點我，自己就會留意番。」

作為年輕球員之一，劉學銘當然希望獲得上陣機會，但他仍把球隊整體利益放在首位：「作為替補嘅防守球員，要球隊入咗波先有機會出場幫手防守，對於自己同香港隊都係一個好消息，亦係我最期待嘅嘢。不過有時候擺邊類型嘅球員出去，就好睇嗰陣時嘅賽果。可能到最尾一分鐘先出得，就算一分鐘都出唔到，都冇問題。始終要根據比數出後備球員，如果真係出到自己都會好開心，想盡自己一分力去幫助香港隊。」

北韓上網要諗計

盼同老大哥開心share

去年暑假，劉學銘隨香港22歲以下代表隊到北韓，參加「亞洲足協U23錦標賽」外圍賽，得悉當地網絡發展不及香港，想上網就要「諗諗計」，為了克服這個「共同難關」，就令隊友間的感情增進不少，所以今次重遊舊地，學銘就想故技重施，藉上網跟港隊的「老大哥」打成一片，學銘笑着憶述：「當時只有一間房可以分享Wi-Fi出嚟，所以我哋就分成兩批人入去，圍埋一齊用，期間有傾有講，自自然然變得更熟落！」

對於當日的經歷，學銘還記憶猶新：「其實我哋一直都知道有Wi-Fi，但要再分享出嚟有難度，一定要用蘋果電腦先做到！上次就係教練Carlos（菁英發展教練安頓）分享個Wi-Fi出嚟，後尾阿袁（香港飛馬門將袁皓俊）用部唔係蘋果出嘅電腦，整咗兩日先搞得掂。今次再去北韓，到時睇下點樣幫到佢哋上網啦。」