總結：超越波神！大帝連續867場得分上雙
20180331
東網電視
更多新聞短片
勒邦占士取得27分、9個籃板同11次助攻。(互聯網圖片)
騎士喺NBA主場以107:102擊敗塘鵝，勒邦占士攻入27分，包括第4節關鍵時刻獨取8分，個人連續867場得分上雙，打破波神米高佐敦保持嘅神級紀錄，升上聯盟歷史第1位，帶領騎士連贏2場反彈。
雖然騎士教練路爾因為健康問題，歸隊後暫時唔會親自指揮球隊，而且佐治希爾攻入8分後，第3節突破期間踩中朗度隻腳扭傷離場，同時路夫又受到右腳筋腱傷患困擾，一度被換走，不過勒邦占士有27分、9個籃板同11次助攻，成功帶領騎士贏波。
大帝喺開波後連中5球，改寫米高佐敦嘅連續得分上雙紀錄，當時騎士更加嗌暫停，畀機會佢揮手多謝球迷支持，最後大帝仲以941場得分20＋，超越高比拜仁升上聯盟歷史第3位。另一方面，安東尼戴維斯得16分、8個籃板同3次助攻，阻唔到塘鵝3連敗。
同日，火箭喺主場以104:103險勝太陽，最多落後21分下完成逆轉。雖然基斯保羅、艾歷哥頓同連尼被安排輪休缺陣，但占士夏登取得28分、8個籃板同10次助攻，包括打到第4節上力攻入13分，期間仲射入高難度3分幫球隊追平，最終帶領火箭11連勝。
最新賽果(左方主場)
魔術 82:90 公牛
鷹隊 91:101 76人
騎士 107:102 塘鵝
火箭 104:103 太陽
雷霆 125:126 金塊(加時)
獨行俠 92:93 木狼
爵士 107:97 灰熊
湖人 122:124 公鹿(加時)
拓荒者 105:96 快艇
Follow東網體育IG一齊撐本地運動員！
東網體育FB同你追實體壇每個精彩時刻！