【港超專版】葉佳與和富大埔共進退

20180409
東網電視
更多新聞短片
習慣於人前表演,於鎂光燈下接受觀眾投來仰慕的目光,不是所有人都能從瑰麗舞台毅然退居幕後。和富大埔的老大哥葉佳效力球隊10年,曾是球隊的主力、球迷的寵兒。然而與球隊歷盡高山低谷後,今個球季選擇脫下球衣,於幕後演活一個「小角色」。
圖/文:胡恩晴
被尊稱為「佳哥」的葉佳,足球生涯始於街場,後來被相中於98年加盟上海申花青年軍,但由於不適應內地足球文化,經朋友介紹以國援身份來港加盟流浪,一季後便遇上跟他「打風都打唔甩」的和富大埔:「都幾長情,同大埔一齊經歷奪銀牌、足總盃、升班、降班,一個球員好少經歷兩次降班都喺同一間球會。」這位生於上海的前鋒,早已留着「大埔的血」,更於大埔落地生根:「啱啱加盟大埔覺得同其他球會唔同,好似一個大家庭,依家屋企人、小朋友,成個生活圈子都喺呢度。」
最關心青訓培育新血
身高1米86的「佳哥」初加盟大埔時,因身材魁梧及腳力驚人成為球迷寵兒,取得本地球員身份後更入選大港腳,足球路如日方中之際隨大埔升升降降,最終在16/17年球季結束後,脫下綠色戰衣,轉任助理訓練員兼女子隊教練。「初時真係唔習慣,做球員時每日只係諗住練好啲波、自己努力啲就得。做幕後工作反而諗多咗,主教練好重視每一次練波,所以我每一次都要準備好,等球員全心全意投入練習。」
球隊每次練習,「佳哥」都會比所有人早到兩小時,練習後收拾物資,再返回球會處理文書工作:「之前幾十年都係踢波,突然間要我去打字、寫計劃書,真係好唔習慣。好嘅係阿智( 陳旭智)、阿興(呂志興)好肯教我,包括電腦同埋點樣管理女子隊。」除了任女子隊教練,「佳哥」今季亦着力培訓U10青年軍:「我最關心係大埔青訓,希望培育小朋友上嚟,啱啱幾年終於有收成,畀主教練睇中落場,包括『肥頭』陳曉鋒,佢今季入波我都好開心。」
為足球少陪家人
「佳哥」日程排得密密麻麻,陪伴家人時間自然較少:「唔踢波點知仲忙,星期六、日又有比賽,陪屋企人真係好少!要等佢哋放假,我又放假先可以帶佢哋出去玩吓。 雖然咁多年佢哋都慣咗,但囝囝有時會講『爸爸今日返唔返工?陪唔陪我呀?』聽到咁講,真係會諗係咪應該陪個仔多啲。」
球員時期助球隊屢奪錦標,掛靴後由綠茵場上退居幕後見證新一代火速冒起,這位和富大埔的幕後功臣只有一個任務:「打好呢份工、做好自己,等球員安心練波、比賽,令教練放心。」
融入球隊唔怕講「譚仔話」
葉佳的廣東話不難明,訪問時對答如流,但他笑言說得像「譚仔話」。初來港時除了在足球路上搏殺,更不怕尷尬努力學習廣東話望融入球隊:「當初係睇電視學,真係要練習、要講!成日畀隊友笑我講得唔好,有時仲專登學我講嘢。」
訪問期間和富大埔助教陳旭智剛好經過,「佳哥」指着對方「控訴」:「呢個笑得我最多!不過都好好,佢會教番我點讀。」他亦即時點評其他內地球員的廣東話:「黃洋講得好好,阿鵬就差啲囉!哈哈!「阿帥」(徐德帥)始終係北方人,難學啲,我來自上海,多多少少都有啲鄉音。」