【港超專版】蘇洋：有咩態度就有咩成就！

《喜劇天王》的尹天仇有一本《演員的自我修養》，標準流浪教練蘇洋心中亦有一本《足球員的自我修養》。踢過中超、跟過國家隊教練訓練的蘇洋表示：「香港年輕球員要對自己有要求，要有應有的專業態度。」而作為教練，他亦會以身作則，每場付出100％。

圖/文：余樂詩

蘇洋，2007及09年球員時代於長春亞泰分別贏過中超冠軍及亞軍，其後來港發展，2016年於標準流浪退役。「呢幾年其實都有努力過、付出過，不過都冇機會再拎到冠軍，但球隊都有驚喜畀我，起碼有年輕球員願意喺呢度跟我一齊學踢波，亦有機會畀我分享咁多年喺內地踢波嘅經驗，對我嚟講係一個安慰。」跟很多足球員一樣，蘇洋敵不過傷患困擾而無奈退役：「前年膝頭出現問題，依家一踢波就有積水。」

波癮大想落場搏殺

原來，蘇洋的「教練之路」早在中超時代「展開」：「中國國家隊教練，例如高洪波、李樹斌等我都跟過，嗰時每日練波之後，我都會紀錄番自己練咗啲乜，傳波、對抗練法我都有研究。 」前年於香港考教練牌，今季蘇洋機緣巧合下接手標準流浪，以32歲之齡成為港超聯球隊教練。「首先我要好多謝會長莫耀強同『菲臘哥』（即李輝立）畀機會，令我可以咁年輕就做教練。」這位前流浪後衞直言，有時都會懷念昔日在足球場上的自己：「睇見球隊落後，球員能力下降，我都會諗：『可唔可以換我出去呀？』但呢個始終係諗法，依家有時玩吓波都叫享受到足球員嘅快樂。」

以年輕球員為主的標準流浪今季在港超只得一勝，暫排榜尾，談到一班年輕人，蘇洋總是帶點激動：「呢度有好多具潛質嘅球員，不過佢哋始終年輕，仲有好多需要改善，例如職業態度。」又回到「態度」的問題，這次蘇洋對「職業態度」作出具體的說明：「係包括球場內、外嘅態度。例如普遍香港球員體型比較單薄，我哋只得一個半小時練波，其實你可以練波前去做下Gym。體能唔夠嘅，練完波後都可以自己返球會慢跑、舉重，咁先係場外職業態度。場內呢，教練一出聲點樣要求你時，你就要即刻集中。90分鐘嘅訓練，最起碼都要90分鐘百分百留心，因為比賽時又有幾多分鐘可以畀你咁樣唔集中呢？」要做「死茄哩啡」還是「專業演員」，其實都是看自己。

鼓勵小將超越自我

標準流浪僅餘4場聯賽賽事，下一場將會再對和富大埔，蘇洋藉機會鼓勵球隊：「希望年輕球員相信自己有能力可以超越自我，喺最後4場聯賽，希望打出流浪拚搏精神，唔好浪費球隊畀你嘅機會。」