港超聯　IGOR省兩粒！和富大埔主場大捷

近4仗錄得不敗走勢的和富大埔，周日(15日)於主場迎戰榜尾的標準流浪，雙方繼足總盃8強後再度交手，和富大埔最終憑隊中神射手伊高沙托尼下半場梅開二度，以5比1大勝標準流浪，乘第二位的香港飛馬今周失分，追至只剩2分差距，在餘下兩輪賽事均擁有主場優勢下，全力衝擊港超聯「二哥」位置。而如尾場的夢想FC贏波，標準流浪將宣布護級失敗。

雖然傑志日前已提前奪得聯賽冠軍，但來屆亞洲賽資格仍尚餘1個名額，若「藍鳥」同時贏得足總盃冠軍，聯賽「二哥」將代表香港出戰下季亞洲賽。「三哥」和富大埔當然排名希望再進一步，開賽7分鐘先有李嘉耀右路傳中，皮球省中人稍為改變方向，但迪亞高仍飛剷起腳，惜被奧力斯接實。戰至11分鐘大埔終於打開缺口，憑死球創造連番攻門，陳俊樂禁區頂遠射，由門前的梁冠聰「加多腳」破網，大埔領先1比0。6分鐘後大埔再靠罰球撕破流浪防線，謝家強接應後施射中柱彈出，迪亞高衝前「執雞」補中，助球隊擴大優勢至2比0。其後大埔先後有伊高沙托尼單刀挑射中柱，以及謝家強近門跳頂出界無果，半場領先2比0。

換邊後大埔攻勢仍浪接浪，49分鐘伊高沙托尼射門被擋，尾柱的黃威面對空門補射，雖然奧力斯回身撲出，但球證指皮球已過白界，入球有效，大埔拋開至3球優勢。流浪之後有佐佐木周近門失機，以及卡拉錫抽射高出，直至62分鐘再被大埔一次反擊突襲，陳俊樂傳予迪亞高再回後，伊高沙托尼「燙」遠柱入網，其後這位大埔隊中神射手於73分鐘重施故技，個人梅開二度，亦助大埔贏到5比0。雖然摩域治於79分鐘接應角球頭槌破蛋，大埔最終仍大勝流浪5比1，賽後16戰得31分，只落後第二位的香港飛馬兩分。至於全失3分的流浪仍位列榜尾，在剩餘3場聯賽下落後第9位的夢想FC8分，只要尾場的夢想贏波，流浪將會宣布護級失敗。

助球隊打開紀錄的「大佬」梁冠聰慶祝時表現激動，賽後透露因今仗有「聰媽」入場支持：「係開心嘅！始終入咗開齋波，今場難得媽咪嚟咗，今年媽咪忙少入場，但係一入場就有入波好開心！遺憾係入咗5球失返1球，作為防守球員你踢89分鐘好波都無用，第90分鐘出錯，人哋就覺得你係一個唔好嘅防守球員。希望球隊繼續保持集中，依家各項賽事有份，希望大家繼續做好自己，飛馬啱啱失分希望追趕到佢哋，拎到聯賽第二之餘贏埋足總盃。」