巧感動！天使左手紋身有段古
20180420
東網電視
更多新聞短片
迪馬利亞(小圖)左手紋身關於佢小時候鄰居同朋友。(互聯網圖片)
即上英超刨績王：http://win.on.cc/epl
街童變球星，全憑夠熱誠！阿根廷國腳迪馬利亞點樣由一個皮包骨嘅細路，成為世界一級球星？阿根廷傳媒《infobae》趁住世界盃仲有唔到兩個月開打，去到迪馬利亞自細生活嘅地方，打聽佢成長嘅秘密。
迪馬利亞細個生活喺羅薩里奧北部一條叫Perdriel嘅街，當地就算稱唔上係貧民區，但都好唔得太多，佢就喺屋企旁邊嘅街道踢波。偏偏就係呢笪地方同身邊大班好朋友，令「麵條」愛上足球，開開心心度過自己嘅童年同青春期嘅一部分。迪馬利亞一個好友回憶當年舊事咁講：「我哋就喺度踢足球，攞兩塊石頭做龍門，一邊兩舊。」佢仲大讚迪馬利亞天份過人：「迪馬利亞4歲就踢到好似8歲細路咁。」
呢份由細培養出嚟嘅友情，令迪馬利亞收穫一群死忠Fans，一群永遠互相扶持嘅朋友，無論迪馬利亞定佢班老死，人人手上都有一處紋身，記念呢份深厚情誼，「麵條」亦經常向人展示呢個紋身：「喺Perdriel出生係我生活中，發生喺我身上最美好嘅事情，有一個關於我嘅鄰居同朋友嘅紋身，令我感到驕傲。」時至今日，Perdriel街依然係迪馬利亞嘅避風港：「當我回到舊居嗰陣，佢哋令我忘記了一切‧‧‧‧‧‧每次我打波，總會接收我班朋友嘅訊息，我個腦入面有佢哋，我個女，我老婆同我父母，一群喺我背後支持我嘅人。」
Follow東網體育IG一齊撐本地運動員！
東網體育FB同你追實體壇每個精彩時刻！