港超聯 足球明星選舉有得投票啦!

20180420
東網電視
更多新聞短片
香港足球總會周五(20日)舉行記者招待會,公布「2017/18香港足球明星選舉」詳情,今屆選舉以「Be the Crowning One」為主題,頒獎典禮將於5月17日(四)舉行,屆時將公布各個獎項的得獎名單。與往年一樣,大會設立了「香港足球先生」、「香港足球明星十一人」、「最佳教練」、「最佳青年球員」、「最受球迷歡迎球星」,以及「球員之星」等17個獎項,投票期為4月20日至5月6日,各位球迷快啲投票啦!
【投票呢度】 https://www.hkfa.com/vote 
獲提名的傑志後衞「唐文」唐建文,今季憑着在亞冠盃及本地賽事的可人表現,成為球迷的寵兒。對於「香港足球先生」,他早已屬意隊友華杜斯:「華杜斯喺轉攻為守、轉守為攻方面都係全靠佢,加上今季入咗10球,表現可以話係光芒四射,我睇唔到有同佢爭勝嘅對手!」自華杜斯加盟,唐建文稱獲益匪淺:「我喺佢身上學到一種態度,落到場每一下都唔想輸,佢好想比賽,如果你叫佢打後備佢會唔開心,佢嘅鬥志係感染到其他人。」今季傑志能夠衞冕聯賽冠軍、參與亞冠盃,而「唐文」更獲徵召入選香港隊。然而,在足球路上他仍未滿足:「足球員唔會有豐收,一日未完結都唔知自己去到邊,可能將來仲有更多呢?」至於自己能否獲獎,「唐文」早已拋諸腦後:「冇咁諗過,為球隊攞盃緊要過足球明星選舉。」
同樣在今季憑出色表現,獲提名的香港飛馬中堅張志勇表示:「上年表現可能唔係咁好啦,所以冇提名我,今年好開心憑自己嘅表現、努力可以再做番候選人,所以好開心。」以華人中堅的身分成為候選人之一,「阿勇」認為是對華人中堅的肯定:「兩場代表隊,加埋球隊喺聯賽嘅表現,我覺得華人中堅真係唔會輸蝕畀其他對手。季初自己知道唔係正選,好開心可以透過努力說服教練團,話畀佢聽我先係正選,所以都好滿意自己表現。」曾屢受球迷批評的張志勇希望球迷繼續支持:「以往見到啲留言都係負評,今年終於見番啲畀到動力我嘅留言,我亦都好想同球迷講:『希望我今年嘅表現冇令到你哋失望,亦希望你哋可以繼續支持我,好希望你哋投我——香港飛馬張志勇一票!』。」