【 2017/18香港足球明星選舉】傑志

【投票呢度！】

www.hkfa.com/vote　

今季傑志喺聯賽方面可謂一支獨秀，除咗依然未嘗一敗，亦係聯賽入球數最多同失球數最少嘅球隊。

成績穩定加上發揮出色，前匈牙利國腳中場華杜斯可謂功不可沒。直至現時為止，華杜斯喺聯賽所有賽事全部正選上陣，踢足！兼且有8個聯賽入球，係入波最多嘅中場球員。佢嘅出色表現大家有目共睹，目前公眾投票嘅數字顯示，華杜斯大有機會成為票王！

至於傑志其他位置嘅球員表現亦相當唔錯，前鋒位置嘅盧卡斯以15個聯賽入球做緊領頭羊；中場亦有費蘭度、黃洋及林恩許齊齊獲提名。後防方面獲提名嘅就有丹尼、金奉珍、艾里奧及唐建文（唐文暫時亦係本地球員中獲得最多公眾投票嘅）！

年青球員方面，傑志就提名咗鄭展龍同巴拉克。其中鄭展龍季中回歸傑志，喺亞冠盃攻入致勝一球，助傑志擊敗柏雷素爾，取得亞冠第一勝，相信令唔少球迷印象深刻。