香港女足　獲和富社企贊助3年

香港足球總會周二（8日）於足總大樓舉行記者會，並宣布獲得和富社會企業支持，贊助65萬元推動香港女子足球發展，計劃在未來3年推廣青少年女子足球運動，同時亦安排和富慈善基金管理委員會成員李麥潔娉出任香港女足代表隊名譽團長一職。

足總主席梁孔德表示，對於獲得和富社會企業的贊助感到高興，亦指女子足球近年來的發展漸見生色，同時亦有不少女子球員冒起，並感謝他們近3年來對推動女足發展的支持。至於和富社會企業執行總監蔡德昇則指，過去3年跟足總合作得非常愉快，並指去年女足發展最令人鼓舞的事情，就是張煒琪獲得澳職球隊布里斯班獅吼的垂青，亦期望將來會有更多女子球員獲得外流的機會。

足總女子足球經理黃若玲（Betty）感謝和富近年來的支持，亦期望女足發展能夠得到延續︰「首先要多謝李生（和富社會企業會長李宗德）李太（李麥潔娉）呢3年嚟嘅支持，我哋女子足球主要嘅大方向有兩個；一個係基層嘅發展，希望吸納更多女孩子參與足運，從而增加足球人口，第二個大方向就係女子代表隊喺國際賽上有更好嘅成績，其實兩者係相輔相成。我哋要有更多嘅足球人口，先可以搵到更好嘅球員，而和富最近3年喺呢兩方面都支持咗我哋好多。」「Betty」續道：「我哋最近3年做咗好多學校嘅推廣，我哋入學校去宣傳女足之餘，亦都利用資源去舉辦比賽。以往女足喺學界嘅足球賽事並唔多，不過最近兩年和富資助我哋舉辦7人賽，令女子參與足球嘅機會大咗好多。至於女子代表隊始終都係業餘球員，一班球員放工放學後練波係辛苦嘅，但每到佳節每位球員都會收到李太送嘅禮物，呢個行為係好窩心嘅！」