港超煞科　蔡尚圻：大埔唔會走樣只會更強！

和富大埔於主場絕殺香港飛馬，以37分的第二位完成今屆賽事，球隊主席蔡尚圻表示今場獎金一定令全隊「開心」：「大家咁肯為我搏，我都唔會刻薄佢哋！每個有份踢嘅都會覺得呢場獎金好『開心』㗎喇！至於班費方面，資源上我哋會有所提高，至於係幾多，我哋仲有同贊助商商量。」

蔡尚圻更保證大埔只會更強：「骨幹球員大部分會留低，好多熟悉面孔會繼續喺到出現。我可以應承大家呢隊大埔唔會太走樣，只會強過今年！李志堅我留硬，佢一定要留低幫我手！我希望球隊喺決賽同亞洲賽盡力、畀心機證明自己！」

至於主教練李志堅「堅Sir」賽後表現激動：「我認為今場大家差唔多，係第2同第3之爭，見到今場所有球員都好有決心、好有鬥志，真係好正！呢個運動應該係咁！坦白講呢場贏咗拎第二同埋亞協，當然係畀球員一個獎勵，呢場大家超晒負荷去踢，希望大家可以盡快恢復，準備下一場波！」

對於球隊已穩袋亞協入場券，「堅Sir」亦謂來季人腳大致相同：「我未拎過亞協，第一次㗎啫！我哋有亞協呢個機會，希望各方面都好傾啲，唔止係贊助商，連球員都會諗多咗。其實大部分球員都偏向留低，有啲已經簽咗好似伊高沙托尼、杜度同艾華度，佢哋一早屬意留低，伊高沙托尼直頭話留喺香港踢嘅話，一定係踢大埔，我覺得係大埔令佢哋想留低，呢個重要過一切。我認為咁就係搞足球，我哋只係初哥。希望一步一步嚟，可以發展得好啲。」