保方宣布離開祖記 或轉戰英超做紅軍!

20180517
東網電視
更多新聞短片
(Getty Images)
即上英超刨績王:http://win.on.cc/epl 
傳奇保方正式宣布,季尾將會離開祖雲達斯結束17年「班馬」生涯,周六意甲對維羅納,將會係佢告別戰。現年40歲嘅保方,被廣泛認為係史上最佳門將,共為祖記取得11次意甲冠軍。但離開祖記並唔代表退休,保方表示將於下周決定會否繼續綠茵生涯。保方肯定表示,如果繼續當球員,只會去可以爭逐最高榮譽嘅球會,相信佢希望奪得歐聯冠軍,以圓滿光輝嘅職業生涯。
剛為祖雲達斯取得意甲冠軍,保方於當地舉行記者會,宣布離隊決定,並確定會退出國家隊,六月四號意大利於熱身賽對荷蘭,保方已拒絕被徵召。保方話:「今日我嚟到,係帶住開心快樂嘅心情宣布呢個決定。周六係我最後一次為祖記落場,希望可以取得勝利,呢樣嘢好重要。多謝祖雲達斯。呢度畀咗好多嘢我,令我有置身家嘅感覺。未來我或者會歸隊,只要球會需要我,我會義不容辭幫助祖雲達斯。」周六最後一戰,保方話唔希望做焦點:「我希望當日一如以往,大家只當我係祖記嘅一員,係值得為球隊上陣嘅一員。其實我好細個嘅時候,就算生日都唔想成為主角。」
對於有傳保方將會轉戰英超加盟利物浦,保方話:「之前幾日,我都好肯定自己會退休,但近日我的確收到好幾個邀請,無論係做球員或做幕後都有。下星期我會作出決定,依家我真係唔知。但如果繼續踢,就係要挑戰最高榮譽,因為我天生就係個戰士。」
保方離隊後,基亞連尼將接任隊長一職,而前阿仙奴門將施捷施尼會擔任一號門將。
東網體育FB同你追實體壇每個精彩時刻!