直播埋牙戰Rd 1 和富大埔傑志決戰菁英盃

2018年05月18日 22:41
東網電視
更多新聞短片
on.cc東網周六下午3時直播

收看直播,請按東網APP頂部的直播ICON;
或按以下直播Link:http://tv.on.cc/live 

菁英盃決賽周六(19日)下午假香港大球場上演,由今季港超冠亞軍及同時進身下周足總盃決賽的傑志和和富大埔爭冠。力爭衞冕菁英盃的和富大埔,主教練李志堅有望創下個人「3連霸」紀錄,至於以本地「3冠王」為目標的傑志,新出爐的最佳教練朱志光亦希望首奪這項錦標!究竟哪隊能先下一城?記住黐實東網直播睇好波!
(on.cc東網周六下午3時直播)

和富大埔於聯賽煞科戰主場絕殺香港飛馬,並鎖定聯賽亞軍排名,由於「綠戰士」足總盃的對手為聯賽冠軍傑志,因此變相已奪得來季亞協盃入場券,大埔主教練李志堅近兩季分別帶領香港飛馬及和富大埔奪得菁英盃,他周五(18日)出席賽前記招時信心十足︰「菁英盃畀到年輕球員多啲比賽嘅機會,好好彩自己贏咗呢個盃兩次,球隊都對奪冠好有信心。」

「堅爸」有信心個人3連霸

然而,「堅爸」強調球員心態將會是勝負關鍵︰「球隊上場無論攞到亞協資格與否,都擔心會影響到心態,始終都打咗一整季,雖然上場唔係盃賽亦唔使加時,但強度同壓力都好高,所以要點樣調節球員心理係好關鍵。對住今季聯賽冠軍嘅隊伍,對手各方面條件都好,今季亦輸過畀佢哋兩次,所以今場真係要有好好表現先有機會贏。」

朱Sir:恨攞呢隻盃

日前在足球明星頒獎典禮大豐收的傑志,今季能否完成「3冠王」霸業,就要視乎能否在菁英盃及足總盃兩度擊敗大埔,主教練朱志光坦言,球隊在聯賽爭標及同時應付亞冠戰線下,未能給予小將太多上場機會︰「今季冇畀年輕球員太多上陣機會,始終球隊要喺積分榜鞏固領先優勢,不過佢哋都唔係完全冇踢,喺季前同社區盃對東方龍獅都有後備上陣。球隊征戰咗咁耐,身心同精神上都會疲倦,要有適當嘅調節,球員喺場上先可以保持戰意。」

「朱Sir」亦指,到了季尾不傾向讓球員過於操練:「球隊有個別球員年紀相對大,如果逼得太緊,佢哋可能會厭戰。盧卡斯受傷,陣容上球隊唔完整,但希望球員保持到狀態,特別係呢隻盃我未捧過,希望明日(周六)有機會掂吓呢隻盃!」

華杜斯:爭冠幫科蘭賀壽

剛於香港足球明星選舉成為「四料足球先生」的傑志中場華杜斯,上季協助球隊奪得聯賽、高級組銀牌及足總盃,今季協助「藍鳥」蟬聯聯賽及奪得社區盃,這位匈牙利前國腳希望可以贏盡本地賽事獎牌︰「喺獲得個人殊榮後,就要將精神集中喺決賽。菁英盃係我同球隊都未贏過嘅盃賽,所以希望有第一次。」他續道,希望為好友科蘭送上39歲的生日禮物 ︰「當然球隊唔係只為科蘭爭冠,但我知道佢會睇呢場波,我希望可以將佢收睇嘅時間,確保喺90分鐘,為佢送上生日禮物!」

陳俊樂與黃洋一對港隊中場昨日齊齊出席賽前記招,被問到對方優點時互派高帽。黃洋笑言場上的「樂仔」有自己的影子,今年心目中最佳中場的一票,亦有對方的份兒,並稱讚「樂仔」擁有身體質素之餘,進取心態亦值得年輕球員學習。至於陳俊樂則形容黃洋是自己的學習對象,當中包括防守走位及控球能力,並期望藉決賽平台,令大家的能力有所提升。