【世盃倒數】日本揀晒舊人　貪504好意頭

即上彩報世盃專頁：http://win.on.cc/football/cup2018/　

日本足協周四下午正式公布世盃23人大名單，所有主力球員都榜上有名，形成一條「504」骨幹，只得淺野拓磨、井手口陽介同三竿健斗等新星落選。

監督西野朗喺下午3時許先公布名單，一班國腳上午離開喺橫濱嘅集訓駐地嗰陣，長谷部誠、香川真司喺酒店大堂都有幫粉絲簽名，岡崎慎司亦笑臉迎人，似乎知道自己得咗。對於日本重用原有骨幹，「FOX體育」亞洲版聚焦介紹岡崎慎司、本田圭佑、香川真司、長谷部誠同長友佑都，不過就質疑呢「五銃士」（五個火槍手），包括岡崎慎司、香川真司、本田圭佑、長友佑都同長谷部誠嘅「經驗值是否可以引領日本喺世盃走向成功？」

比較好笑嘅係，「FOX體育」話「五銃士」一共獲得502頂國腳喼帽，馬上有日本傳媒出嚟糾正，話係504至啱──岡崎慎司（111頂喼帽/50入球）、香川真司（89頂喼帽/29入球）、本田圭佑（93頂喼帽/36入球）、長友佑都（103頂喼帽/3入球）、長谷部誠（108頂喼帽/2入球）。咁又係嘅，「唔死」梗係好過「唔易」，當然要強調係504啦，好意頭吖嘛。

但係日本周三喺熱身賽淨吞加納兩蛋，就惹嚟大量負評，連法國著名體育報章《隊報》都猛烈抨擊「藍武士」，認為「日本有好多機會，但表現非常糟糕」，形容佢哋係今屆決賽周最弱球隊之一。周三現場觀戰嘅前日本主帥、巴西名宿薛高都話：「直向傳球較少，唔夠進取。」

即使不被睇好，西野朗依然強調日本以小組出線為目標：「我有一個強烈嘅願望，目標就係喺分組賽突圍，向世界展示日本足球。」談及挑選香川、本田等大牌球星入伍，佢解釋話「香川有足球智慧，本田對球隊就具備影響力」。

日本23人名單：

門將：川島永嗣、東口順昭、中村航輔

後衞：長友佑都、槙野智章、吉田麻也、酒井高德、酒井宏樹、遠藤航、昌子源、植田直通

中場：本田圭佑、原口元氣、宇佐美貴史、山口螢、長谷部誠、大島僚太、香川真司、柴崎岳、乾貴士

前鋒：大迫勇也、武藤嘉紀、岡崎慎司

Go Go 開波 GOAL DX 策略手遊

贏盡100萬現金獎賞：https://goo.gl/irtKhK　

東網體育FB同你追實體壇每個精彩時刻！

http://bit.ly/2ecTF2A