港超聯　「大頭文」：凱景組軍情況樂觀

香港足球總會周五（1日）召開「2017/18年度香港超級聯賽球會座談會第三次會議」，其中新一季落實征戰港超聯的凱景，會籍持有人馮凱文對班費持樂觀態度：「由落實到依家大約個幾禮拜，依家都係等贊助商落實畀幾多金額我哋，最終班費幾多答實唔到住，但係都樂觀嘅。」他續指班費部分源自「有心人」：「我哋班費有一部分係嚟自拔萃舊生集資畀我哋，一班師兄支持一班師弟，都係好事嚟。」至於確實金額，他謂：「大約一兩個禮拜後，稍後球會會有安排，一日未落實一日都唔可以公開住。」

問及組軍情況，綽號「大頭文」的「馮Sir」稱：「組軍情況無乜太大問題，大部分年青球員都係由細跟我到大。依家再會搵啲有經驗嘅華人，外援方面都要視乎個預算，我希望會親身飛過外國搵，多數都係屬意巴西同西班牙，位置方面會係中堅、中場同埋前鋒。依家已經簽咗11、2個年青球員，較為特別係當中有8、9個『拔萃仔』。」守門員方面，因原任門將為早已離開職業足球的邱于銘，故「馮Sir」需另覓人選：「睇下到時市面有咩揀，一日未簽實一日都唔可以答實大家，但合作過會好啲，大家了解大家，當然有潛質嘅我都歡迎嘅。」

至於新球季目標，「大頭文」坦言預了要護級，惟他期望：「希望可以提攜到一啲有潛質嘅年輕球員，呢樣係我自己最想，我最想可以培訓到年青球員出嚟，呢個係我自己嘅心願。我盡咗自己最大嘅努力，機會喺度啦，睇下佢哋努唔努力啦！」