女足張煒琪「韓流」在望

2018年06月07日 15:12
東網電視
更多新聞短片
張煒琪(中)與陳偉豪(左)及安達合照。

除卓耀國外,周四(7日)同樣到鑽石山荷里活廣場出席世界盃活動的,還有早前外流澳洲的「女港腳」張煒琪,以及效力港超聯球會夢想FC的隊長陳偉豪。

活動過後,張煒琪指來季去向未明:「未知,因為球隊未有時間傾合約,自己之前都有整段片畀其他國家嘅球隊睇,依家目標希望去到南韓。」若成事,「煒琪」需面對南韓的語言障礙,她表示:「南韓都係亞洲地方,有咗澳洲經驗之後都唔會太擔心。」印尼雅加達亞運將至,她期望:「始終我跟列卡度時間短,想借亞運同球隊磨合得好啲!希望入到波,唔使成日『食蛋』!」

俄羅斯世界盃將於下周開打,「煒琪」指要準備亞運、教波,但仍會抽時間看,因為看球賽都會讓自己進步。另外,較少出席商場活動的她坦言:「10年前我係嚟玩,估唔到10年之後嚟做嘉賓,感覺好難形容!」

至於「豪哥」陳偉豪透露來季會繼續效力夢想FC,他指假期因忙於考C級教練執照、出席商場活動等,或未能與兒子一同觀賞世界盃。穿上阿根廷球衣的「豪哥」稱希望今屆阿根廷能夠奪得冠軍。對於荷里活廣場的不規則足球場,他則大讚過癮:「個球場不規則幾好玩,有時間會帶兩個仔嚟玩。」

Follow東網體育IG一齊撐本地運動員!
http://bit.ly/2EYxoRh 

東網體育FB同你追實體壇每個精彩時刻!
http://bit.ly/2ecTF2A