桂神最好傾　同何B講世盃勁盞鬼

金句：經歷世盃6個10年 適逢其會今屆會何B

2018年俄羅斯世盃決賽周今晚揭幕，同大家展望今屆賽事之前，先分享自己一些巧合兼具人情味嘅世盃往事。

本人已經年過70，自1954年開始留意世盃，當屆由球王普斯卡斯率領、不可一世嘅匈牙利，喺決賽面對曾以3比8慘敗畀佢哋嘅西德，竟於領先2粒之下，反輸2比3大熱倒灶，呢場史稱「伯爾尼奇迹」令我銘記在心。當年我哋只能靠報紙知道賽果，或世盃結束後去戲院睇番當屆精華片段。去到1958年，由於我就讀嘅母校聖若瑟書院1名同窗，係當時巴西領事嘅兒子，不斷將當屆「森巴兵團」以424陣式首度稱霸世盃嘅威水史講我知，更有年僅17歲嘅新星比利冒起，為人津津樂道。

1982年無綫有份轉播世盃，當時執教東方嘅我獲邀入評述行列，鑑於本人係「番書仔」中文麻麻，佢哋就請埋金牌司儀何守信幫手，教識我好多中文術語及點樣評述比賽，因此結緣，特別一提，何B師傅嘅英文名Ivan Ho，係來自英國中古時代嘅忠心勤王英雄Ivanho。何B師傅主持節目總是不慍不火，會將重心放喺主要人物而非自己身上，真心令人佩服。

今年俄羅斯世盃，Peter將與何B師傅故劍重逢，透過大氣電波用聲音直播部份世盃賽事，而香港唯一女國際球證羅碧芝，以及多名本地球壇名宿亦會參與其中。另外，著名騎師兼我老友「雷神」莫雷拉，會現場直擊巴西對哥斯達黎加添，球迷們要留意喇。

即上彩報世盃專頁：http://win.on.cc/football/cup2018/　

東網體育同你追實體壇每個精彩時刻！　

https://goo.gl/ewVpvE