【懶人包】唔識睇波?3分鐘幫你變專家

2018年06月14日 09:04
東網電視
更多新聞短片

即上彩報世盃專頁:http://win.on.cc/football/cup2018/ 

4年1度嘅體壇盛事世界盃聽晚(6月14日)就揭幕,唔單止全球球迷密切注視,就算平時唔係經常睇波、甚至乎未睇過波嘅人,都好有可能會畀呢股世盃氣氛感染,抱住「唔睇冇話題」嘅宗旨,客串做一個月足球迷。呢個「懶人包」就係為一眾新手球迷特別製作,大家可以視乎自己嘅睇波資歷,報番合適嘅班級上堂呀!

初級-BB班 (睇波經驗:從未睇過1場完整球賽)
中級-小學雞 (睇波經驗:每4年睇1個月波)
高級-學生哥 (睇波經驗:1年睇10場波左右)

●世盃BB班
‧今屆賽事喺歐洲嘅俄羅斯舉行。

‧有32支球隊參賽,每隊都喺自己所屬洲份嘅外圍賽贏出,先拎到決賽周資格。

‧參賽球隊單位係國家/地區,皇家馬德里同曼聯係冇份參加。

‧今屆香港轉播權係由Now TV拎到,免費電視Viu TV會直播其中19場。

‧碧咸、朗拿度同施丹等巨星已經退咗休。

‧尼日利亞件波衫被公認係今屆世盃最靚仔球衣,值得留意。

‧一場波分上下半場各45分鐘(中場休息15分鐘),睇一場波大約2個鐘頭(只限分組賽)。淘汰賽如果90分鐘內打和,會有加時同12碼,隨時打足2、3個鐘頭。

‧奧斯爾、夏薩特、穆罕默德沙拿踢英超,但唔係英格蘭球員。

‧世界體育大國中國隊冇份踢今屆決賽周。

‧開波時間好適合香港人,唔少場次都係6PM至11PM開波,詳細賽程表可以去呢度下載:https://bit.ly/2HKvbcy 

●世盃小學雞
‧賽制:32支球隊分8組,每組4隊,4隊互相對壘,贏波得3分,和波得1分,輸波冇分,每組最高分嗰2隊可晉級16強賽事。如果同分就依次按得失球差、入球數決定排名。

‧根據足智彩奪冠賠率,冠軍大熱係巴西,之後依次係德國、西班牙、法國同阿根廷。

‧上屆世界盃冠軍係德國,佢哋喺決賽贏阿根廷。

‧當今2大球王美斯同C朗拿度,都從未拎過世界盃冠軍。

‧雖然周圍有好多英格蘭球迷,但英格蘭對上一次贏世界盃已經係1966年。

‧傳統勁旅意大利、荷蘭,以及決賽周常客智利、美國都喺外圍賽意外出局。

‧(女球迷專用)除咗C朗拿度外,占士洛迪古斯、基奧特同夏薩特都係值得留意嘅靚仔球星。

‧巴西上屆4強雖然好肉酸咁輸畀德國1比7,但佢哋係史上贏世盃冠軍最多次球隊,一共拎過5次。

‧今屆代表亞洲嘅球隊係日本、南韓、沙特阿拉伯、伊朗同澳洲。

‧分組賽咪走雞好波推介:
-葡萄牙 對 西班牙(6月15日深夜2時)
-阿根廷 對 克羅地亞(6月21日深夜2時)
-巴西 對 塞爾維亞(6月27日深夜2時)
-英格蘭 對 比利時(6月28日深夜2時)


●世盃學生哥
‧美斯今個月就31歲、C朗已經33歲,今屆可能係佢哋最後1屆世盃。

‧冰島同巴拿馬係史上首次參賽,冰島人口得33.5萬,仲少過將軍澳!

‧揭幕戰俄羅斯(世界排名70)對沙特阿拉伯(世界排名67),係決賽周排名最低嗰2隊。

‧目前「世界最高轉會費紀錄」係巴西球星尼馬保持,轉會費達2.22億歐元。

‧今屆最高人工領隊係德國主帥勒夫,佢年薪有331萬英鎊。

‧世盃史上入波最多球員係德國嘅高路斯,由2002年至2014年合共入16球。

‧今屆最老球隊係阿根廷,球員平均年齡達29歲零6個月。

‧今屆最高球員係克羅地亞洛夫尼卡連歷(2米01),最矮係耶耶艾舒歷(沙特阿拉伯)、艾拔圖昆達路(巴拿馬)同梳頓沙基利(瑞士),3個都係1米65。

‧英格蘭係世盃史上射12碼最衰球隊,90、98同06年都係射輸12碼出局。

‧今屆有唔少新例,最矚目係引入視像裁判(VAR)幫助執法、白界線技術判斷入波有冇越過白界,另外喺加時階段,每隊可以獲准換第4個球員。



東網體育FB同你追實體壇每個精彩時刻!
http://bit.ly/2ecTF2A