足球卡世盃狂熱 黑閃尼馬好值錢!

2018年06月14日 09:16
東網電視
更多新聞短片
世界盃足球卡除了有齊32個國家隊伍,亦都有不同的卡種及稀有度。

即上彩報世盃專頁:http://win.on.cc/football/cup2018/ 

四年一度的足球界盛事於俄羅斯舉行,球迷們假如想撐心水隊伍,除了穿上球隊波衫之外,亦不妨嘗試收藏足球卡,對各國的球員有更多認識之餘,同時具有一定的收藏價值,所以今次就找來足球卡愛好者阿軒,來分享一下應屆世界盃足球卡有幾珍貴,你又估下邊張卡價值最高呢?

世界盃足球卡早在8年前已經面世,不過當年卡的製作和用料較為粗糙,而卡廠就在4年前推出名為PRIZM版的足球卡,大家會見到卡面有如金屬一樣,用料亦厚身和令身,阿軒表示:「今屆世界盃足球卡的種類多元化,而且簽名卡比以往容易出,相反特別卡就較為難中,而當中亦有分為不同的稀有程度,黑閃為全球僅有1張,金閃則是全球限量10張、綠色碎閃為全球限量25張等,還有吉祥物的足球卡,在8,000幾包卡中僅有1張,所以非常罕有。」足球卡除了有現役球員,亦都有一些經典球員卡,例如巴西的李華度、法國的韋拉等。另外亦有一些「Signature Moments」的卡種,介紹對上幾屆世界盃的特別球員,還有「National Landmark」的卡種,特別在於球員背後的背景會加入所屬國家的元素,畫面相當豐富。

假如想碰碰運氣,去抽一下世界足球卡,可以到太子聯合廣場、旺角信和中心、灣仔新世紀廣場,裏面的足球卡專賣店均有發售,一盒大約由HK$800至HK$1,000不等,而每盒面有24包包裝,每包則有6張足球卡。阿軒指:「我暫時『爆盒』就開了15盒左右,當中最好的是金閃尼馬,不過最想中英格蘭的三人簽名卡,因為張卡有我最愛的佐敦‧軒達臣,當然如果中到C朗或美斯的簽名卡都好心滿意足。」阿軒補充:「如果想搵自己想要的心水足球卡,上ebay有機會會搵到,收藏價值最高的卡種,固然是C朗、美斯、尼馬等一級球星卡,根據ebay最近的交投記錄,全球只有一張的黑閃尼馬簽名卡,最終就以5,900美元售出,另外有張黑閃C朗(無簽名),亦都以5,200美元交投成功。」

足球卡主要由Panini、Topps、Futera三大卡廠生產,不過應屆世界足球卡以Panini包攬,阿軒解釋:「Panini較為世界性,因為它獲得了世界足協的版權,所以今屆世界盃的國家隊都出得晒,另外它亦網羅一些大球會的版權,例如巴塞、皇馬、拜仁的足球卡都出得到。另外一卡廠Topps的卡種以聯賽為主,英超、德甲,甚至乎歐聯的版權都屬於它的。最後就是英國卡廠Futera,不過它的產品種類和數量較少,可能每年只得一至兩款產品。」

畢竟足球卡有一定收藏價值,故此卡的保養亦相當重要,玩呢類足球卡最怕卡面會花,又或者角位因碰損而崩,而阿軒會用到卡袋、卡套和卡磚,將卡妥善收納處理好。軟身的透明卡袋的成本最低,大約HK$10至HK$15就有100個,避免卡面刮花;至於卡套的用料較厚較硬淨,張卡唔會周圍郁,亦都保護到四隻角,大概每個HK$2至HK$4;而俗稱「卡磚」磁石盒的保存效果最好,而且採用前後磁石吸附,盒面實淨冇咁容易屈到,差不多每個成本約HK$20至HK$30,用作收藏最珍貴的卡種。

若然你好好彩抽中一些稀有卡,其實可以寄去評級公司,為足球卡評級,訪間大都會選擇BGS和PSA兩間美國評級公司,阿軒謂:「BGS(Beckett Grading Service),以近代卡較多人選擇,因為除左卡評級之外,佢亦會為卡上的簽名作出評級,評級由1至10分,並設有0.5分細分,另外它亦設有4個評級分級標準,張卡有咩問題就一目了然。至於PSA(Professional Sports Authenticator)評級同樣有由1至10分,不過就沒有0.5細分,而且不會有簽名評分。」大家需要將足球卡寄去美國,而時間和價錢視乎所選擇的服務級別而有所分別,香港亦都有店舖專門幫客人寄到BGS評級,每張卡收費約HK$200蚊,大約1個半月左右就能夠取回。

若嫌足球卡成本太高的話,想平玩的話都有其他選擇,其實Panini都有推出《畀你貼》世界盃集圖冊和足球貼紙,集圖冊連3包貼紙包裝都只係HK$50,總共有21張貼紙畀你儲,例如有球員、球場、隊徽、團隊合照等不同種類,因此相當抵玩,當然炒賣和升值潛力遠遠不及足球卡。足球貼紙套裝擁有超過50年歷史,大家可以在便利店買得到,無需走到足球卡專賣店,拆開貼紙包裝後只要貼在集圖冊上即可,收藏亦見方便。

東網體育FB同你追實體壇每個精彩時刻!
http://bit.ly/2ecTF2A