【世盃半場】卓利舒夫美斯上身 俄軍贏2粒

2018年06月14日 23:50
東網電視
更多新聞短片
卓利舒夫完半場前轟入靚波。(法新社圖片)

即上彩報世盃專頁:http://win.on.cc/football/cup2018/ 

2018俄羅斯世界盃揭幕戰,東道主俄羅斯大戰沙特阿拉伯,今仗全球矚目,上半場戰情亦可觀,唔只令現場粉絲High爆,相信本地球迷亦都樂在其中。俄羅斯有主場之利,實力亦優於對手,開波初段已經取得優勢,終憑中場加辛斯基頭槌打開紀錄,加上卓利舒夫美斯上身一扭二入靚波,半場領先對手2:0。

主隊俄羅斯今仗身穿紅色波衫落場,演出亦好似件波衫顏色一樣Sharp醒,面對組織能力一般的沙特,好快就取得優勢。12分鐘俄羅斯取得角球,開出後皮球被敵衞解圍,跟手主隊再斬波入禁區,加辛斯基伏兵遠柱升起頂向遠柱入網,主隊火速打開紀錄。

領先後俄羅斯氣勢如虹,壓住對手嚟打,其中15分鐘取得入肉攻門,可惜被對手門將艾馬約夫撲出,但原來越位在先,個波入咗都唔算。沙特站穩陣腳後打反擊,10號仔艾沙拿維殺入禁區楔贏敵衞頭槌攻門,但卻柱邊出界。

雖然俄羅斯領先半場,但球隊大將、「新沙皇」迪沙高耶夫卻意外傷出,當時主隊打反擊,迪沙高耶夫於半場位置全速跑動時,拉親左腳大髀即時要換走,對主隊肯定造成打擊。

35分鐘俄羅斯中場高路雲,入到禁區跌埋落地,佢投訴被對手侵犯,但球證冇騷佢比賽繼續,俄羅斯未能博得12碼。43分鐘卓利舒夫表現個人技術,於禁區左路一扣扼過兩個敵衞,之後左腳抽個網頂波入網,俄軍半場領先到2粒,形勢大好!

東網體育FB同你追實體壇每個精彩時刻!
http://bit.ly/2ecTF2A