【世盃戰報】俄軍狂入靚波　揭幕喪數沙特

即上彩報世盃專頁：http://win.on.cc/football/cup2018/　

2018俄羅斯世界盃揭幕戰，東道主俄羅斯大戰沙特阿拉伯，俄軍贏波正式展開世盃狂熱！雖然有「新沙皇」迪沙高耶夫傷出，但主隊原來仲有後着，後備入替嘅卓利舒夫先「美斯上身」轟入靚波，完場前又腳趾尾拉西入世界波，帶領主隊大勝5:0，率先取得寶貴3分。

呢場A組賽事，雖然戲碼唔算太吸引，但戰情的確可觀，12分鐘俄羅斯取得角球，開出後皮球被敵衞解圍，跟手主隊再斬波入禁區，加辛斯基伏兵遠柱升起頂向遠柱入網，主隊火速打開紀錄。

主隊主力迪沙高耶夫之後意外傷出，但後備入替嘅卓利舒夫有神來之筆，43分鐘呢位維拉利爾球員表演個人技術，於禁區左路一扣扼過兩個敵衞，之後左腳抽個網頂波入網，半場領先2:0。

換邊後俄軍依然控制大局，51分鐘森美杜夫於禁區外見有空位拉弓一轟，可惜高出。沙特之後取得今仗最佳入波機會，56分鐘右路傳出靚波，艾沙拿維及艾查森均爭些少未能踢中皮球。之後主隊領隊查切索夫換入中鋒迪斯尤巴，原來佢係空中霸王，71分鐘接應高路雲右路靚波頂入，球隊領先到3:0。完場前卓利舒夫腳趾尾拉西又入世界波，加上高路雲右腳罰球射近柱入網，埋單贏5:0。俄羅斯打出漂亮一仗，相信對出線好有幫助。

東網體育FB同你追實體壇每個精彩時刻！

http://bit.ly/2ecTF2A