【世盃罰球王】揭幕戰超勁　寸王想簽高路雲

即睇全場入球（高路雲攻入第5球）：https://bit.ly/2lcOdiW　

俄羅斯於世界盃揭幕戰表現出色，主場5:0大數沙特阿拉伯，取得夢幻開局。卓利舒夫梅開二度當然搶鏡，但球隊陣中最搶手嘅原來係高路雲！呢名22歲創造型中場，今仗轟入靚罰球兼有兩個助攻，演出八面玲瓏，連莫連奴都大讚呢位球星有料到，而早前寸王現場睇俄羅斯對奧地利嘅熱身賽，有機會就係睇高路雲嘅演出。

高路雲身高1米80，效力莫斯科中央陸軍，係俄羅斯嘅中場發電機，身穿17號波衫於揭幕戰正選落場，佢於中場覆蓋範圍極大，擅於突入禁區搵食。雖然年紀輕輕，但高路雲於U17及U19國家隊屢有好表現，19歲就成為大國腳，今戰貢獻兩度助攻，於完場前更於右路射近柱轟入靚罰球，表現極為出色。

高路雲現時身價約值2000萬鎊，據報阿仙奴、車路士及祖雲達斯都對佢好有興趣。今仗賽後意大利記者問佢係咪轉會祖記，佢話：「我好高興祖記對我有興趣，但依家咩都唔會諗，因為我只想踢好世界盃。」而於祖記陣中，佢就最欣賞同為創造性十足嘅保羅戴巴拿。

而正於俄羅斯為電視台做足球分析嘅曼聯領隊莫連奴，亦大讚高路雲：「當迪沙高耶夫傷出後，高路雲被移入中路，佢踢得好好，係球隊嘅進攻泉源，我好欣賞佢。」早前世盃熱身賽俄羅斯鬥奧地利，寸王被影到入場觀戰，當時被認為佢係睇「奧地利伊巴」艾拿奧杜域，但之後好快就傳出，寸王真正目標正正係高路雲，唔知呢位俄羅斯好波之人，下季有冇機會轉投曼聯呢？

即上彩報世盃專頁：http://win.on.cc/football/cup2018/　

東網體育FB同你追實體壇每個精彩時刻！

http://bit.ly/2ecTF2A