「摔跤王」拉莫斯搞完沙拿 今晚輪到C朗!

2018年06月15日 10:35
東網電視
更多新聞短片

即上彩報世盃專頁:http://win.on.cc/football/cup2018/ 

今屆世界盃第1個高潮今晚爆發,葡萄牙對西班牙嘅「雙牙大戰」夠晒睇頭,「靚仔球王」C朗拿度登場勢必令大批女粉絲興奮莫名,不過一眾C朗迷就要做定心理準備,呢位葡萄牙巨星隨時「出事」,事關佢要對住西班牙「殺人王」沙治奧拉莫斯,雖然佢兩個係皇家馬德里隊友,不過「殺人王」出晒名六親不認,隨時連自己友都唔放過!

沙治奧拉莫斯出晒名鐘意踢茅波,佢係西甲史上拎紅牌同黃牌最多球員,上個月歐聯決賽,佢以「柔道式」嘅犯規搞到利物浦前鋒穆罕默德沙拿重傷離場,最終順利幫皇馬捧埋冠軍。有西班牙傳媒翻舊帳,指沙治奧拉莫斯歷來直接整傷過6個球員,就連隊友都中過招!

除咗最新受害人穆罕默德沙拿之外,沙治奧拉莫斯其餘「犯案」受害者包括利雲特嘅拿祖干沙利斯(受傷休息半年)、切爾達嘅卡比爾、意大利嘅蒙杜利禾(又係受傷抖半年)、貝迪斯嘅華迪路(韌帶撕裂)。最神奇係佢曾經喺國家隊練習入面,踢傷埋隊友費蘭度托利斯!嘩,連隊友都落腳咁狠,又使乜畀面C朗呀?

東網體育FB同你追實體壇每個精彩時刻!
http://bit.ly/2ecTF2A