【波多嘢結論】今晚周秀娜定沙拿？唔畀諗！即刻答

話說昨晚劇情講到，周秀娜畀胡定欣陷害，令到三郎誤會咗「娜姐」！馬浚偉為咗出番淡氣，就決定「霸王硬上周秀娜」，劇力萬鈞！！！今晚仲勁，好似話會講劉心悠無啦啦由宮女變做公主，追開嘅朋友想唔睇都唔得啦！不過，今晚周秀娜就同另一個「拿」撞晒期，咪就係8點開波嘅埃及對烏拉圭囉⋯⋯要睇穆罕默德沙拿定周秀娜？真係好難決擇！

其實睇番沙拿嘅遭遇，拎嚟拍套《攻心計》定《深攻計》都OK⋯⋯你睇沙拿呢個純情小子喺「利物宮」一心踢好波，終於由普通宮女，女史變公主，但係可惜人紅自然畀人眼紅，歐聯決賽果吓「踤跤」式攔截陰到應一應，真係慘過陳煒「兜巴星」劉心悠落度！呢位劇情片嘅受害者今晚終於可以復出，好似由暴室返出嚟喇，但就要即刻面對一個比太平公主更險惡嘅對手！究竟沙拿最後能否逃過「哨牙蘇」嘅利牙？呢兩位前度及現役利記「寵兒」對碰，對於作為利記FANS嘅聖上，今晚又會「寵幸」邊個呢？(仲使講嘅咩)

講咗咁耐，其實今晚周秀娜定沙拿都未揀？咁點揀好呀！雖然屋企電視遙控器主人(老母)梗係睇師奶劇啦，但作為有畀家用嘅我，當然要「硬」一次，做一個聖上英明決定睇波啦！畢竟，睇劇睇LIVE好睇啲？定係睇波睇LIVE好睇啲？

睇波唔睇LIVE，不如唔好睇⋯⋯完

波多嘢·結論

Follow東網體育IG一齊撐本地運動員！

http://bit.ly/2EYxoRh

東網體育FB同你追實體壇每個精彩時刻！