孖寶兄弟 甲一對戰贏咗先講!

2018年06月15日 14:20
東網電視
更多新聞短片

勇士「浪花兄弟」名震NBA,香港籃壇一樣有對「孖寶兄弟」,雖然效力不同球隊,但感情可能好過親兄弟,他們就是東方龍獅的吳松峻和遊協的黃律堯。8年前打地區籃球訓練認識,吳、黃二人一起走過不少難關,即使被看成「hehe味濃」也毫不介意,在籃球路上互相扶持,為理想而奮鬥!文、圖︰王藝霖

2010年,吳松峻、黃律堯還只是14歲的「小朋友」,二人參加了黃大仙區的籃球訓練班,從此結緣,「阿堯」說︰「當年吳松峻頭髮好長,好似『浩南哥』,咁啱佢嗰名又難讀,咪幫佢改咗『大佬』呢個花名。」雖然喚作「大佬」,但其實黃律堯反而更像兄長,當吳松峻孤身在台灣讀書,心情低落時,就會向「細佬」求救:「我哋成日facetime,特別喺我之前受傷,或者打得唔好,都會喊住打畀阿堯。」

互相扶持,累積了8年的好感情,二人由外形、說話口吻甚至性格都愈來愈似,訪問全程都默契十足,好像能預測到對方的下一句說話。平日活動都形影不離,睇戲、去沙灘、做gym等等,二人更幽默地說:「可以說對方是不能缺少的一部分。」回想小時候每天像「連體嬰」的日子,兩人都會心微笑:「講吓打波,講下打機LOL,細個真係好開心。」

說二人心有靈犀,好像「hehe味濃」,但他們的確無論食飯、打機,總是輕易就了解到對方的想法。成長雖然是人生的必經過程,這幾年二人都有不少改變,唯一不變的就是他們的友誼,兩兄弟亦有說話想對大家說:

黃律堯:「希望大佬下年台灣UBA可以入到8強,到時我一定到場支持。」

吳松峻:「希望阿堯打到一場,大家都認為係屬於佢嘅代表作。」

--------------------------------------------------------------------

今晚甲一頭場東方龍獅將與遊協正面交鋒,亦是吳松峻及黃律堯首度在甲一賽場交手,對於此戰,二人異口同聲表示,即使情同手足一樣冇情講,定必在灣仔修頓室內場使出渾身解數,助己隊爭勝!

經過5場比賽後,遊協及東方龍獅分別排積分榜在第3、4位,搶入季後賽的機會十分大,但兩隊都有「超級外援」Eric Ferguson和艾利諾在陣,今晚交手肯定十分精彩。提到今晚同場比賽,吳松峻坦言不會留手:「以前我哋打街場,一唔同隊但對位就會好容易打交,因為太熟,佢一個眼神已經知道下一步會點做,所以近年我哋街場都會打同一隊。」然後,今晚一戰二人很大機會正面對決,相信必定會有好戲睇。

「今晚目標當然想贏波,我好大機會要防守艾利諾,除咗做好呢一部分,都想組織好球隊,而且東方龍獅緊逼防守一定要留意,針對呢部分做好部署。」黃律堯說。




東網體育FB同你追實體壇每個精彩時刻!
http://bit.ly/2ecTF2A 

Follow東網體育IG一齊撐本地運動員!
http://bit.ly/2EYxoRh