美斯Hea踢被怒插　網民名宿嗌佢早啲走

東網電視

美斯被網友嗌收檔。(互聯網圖片)

阿根廷喺俄羅斯世盃分組賽以0:3不敵克羅地亞，輸到網友都懷疑係假波。賽後全球怒插美斯，嗌佢「算罷啦」嘅Twitter友留言接近洗版，仲有好多人話要買定花生，坐等美斯第2次宣布退出國家隊呀！

美斯對克羅地亞嘅表現，被批評為冇鬥心冇領導能力，所以Twitter友寧願佢退出國家隊算數，當中有撐有彈嘅，支持佢嘅網友覺得，現時嘅阿根廷根本唔值得美斯嘥精神去搏命，不如等大家知道，假如國家隊冇咗佢會點。

但彈嘅網民仲多，佢哋話美斯踢得咁Hea不如離開算數。事實上，曾經同美斯喺阿根廷國家隊合作嘅薩巴列達都覺得，經歷咁嘅慘敗，美斯真正退出國家隊絕對唔奇，話唔埋最後1場分組賽對尼日利亞，就係美斯嘅國際賽告別戰。

其實阿根廷輸波美斯肯定難受，賽後佢經過採訪區，就全程低頭拒絕受訪，難怪網友覺得，佢可能會好似16年阿根廷喺美洲國家盃決賽輸波後咁，嬲到退出國家隊，仲有網民將美斯同山羊GOAT(意思係史上最佳)嘅合照，惡搞成同驢仔，笑佢啲隊友蠢過乜。

Follow東網體育IG一齊撐本地運動員！

東網體育FB同你追實體壇每個精彩時刻！

on.cc東網