【人物】冰島球員唔冰冷　射手原來是暖男

即上彩報世盃專頁：http://win.on.cc/football/cup2018/

冰島去仗熱血守和勁旅阿根廷，唔少球員都被起底，好似做導演嘅門將荷杜臣、喺鹽廠返工嘅後衞沙華臣，甚至係執業牙醫嘅主帥賀基姆臣咁，成功背後故事感人又勵志，引嚟唔少網民熱烈討論。不過就無人留意到前鋒保特華臣（Jón Daði Böðvarsson），呢位現時效力英冠雷丁嘅射手，雖然喺國家隊只係後備，又冇身兼幾職，不過佢堅係愛心爆棚，冰島今時今日足球發展得咁快，佢都可以話係有出一分力。

保特華臣2012年加入國家隊，但佢超冇架子，除咗落區教波之外，效力挪威球隊維京期間，佢就獲得過年度運動員獎項，結果佢用獎金成立咗一個名為「Knattspyrna Fyrir Alla」嘅基金會，意思即係「Soccer For Everyone」，希望幫助因為貧窮而冇辦法踢波嘅年青人，等佢哋都有屬於自己嘅足球夢。好心有好報，保特華臣喺2016年歐國盃一鳴驚人，分組賽對奧地利嘅賽事中，佢18分鐘就為球隊先開記錄，最終球隊贏2比1，以小組次名晉級16強，令佢成為國家英雄。

故事並未完結，嚟到今屆世盃，冰島喺D組分組賽第二輪就要對住尼日利亞。大戰當前，保特華臣仍然冇忘記踢狼隊時嘅舊隊友、因急性白血病而缺陣世盃嘅超霸鷹首席門將伊基美，日前佢就拉埋成班冰島隊友，拎住印咗伊基美個名嘅冰島波衫一齊影咗張相，放上社交網站支持呢位昔日隊友：「我哋冰島國家隊嘅所有人都會與你同在！」足球建立嘅友誼無分國界，不過錦上添花易，雪中送炭難，賽前向對手送上祝福真係少見，窩心嘅舉動令人融化，佢就係「冰島暖男」保特華臣。

Follow東網體育IG一齊撐本地運動員！

http://bit.ly/2EYxoRh

東網體育FB同你追實體壇每個精彩時刻！