【陣間有金執】阿根廷內亂　美斯真係掂？

即上彩報世盃專頁：http://win.on.cc/football/cup2018/　

世盃D組尾輪生死大戰，「超霸鷹」尼日利亞火併上屆亞軍、有「潘帕斯雄鷹」之稱嘅阿根廷。尼日利亞上仗贏波，間接幫阿根廷重燃出線最後希望，不過佢哋同樣有出線機會，今場贏阿根廷就搞掂，當然唔會放軟手腳。阿根廷領隊森柏奧利被架空，又傳出有球員嘈交，咁多負面新聞下，勝算認真唔高，又點讓得起一球？「雙鷹大戰」一於敲下盤。（Now 616及618台周三凌晨2時直播）

美斯周日生日，阿根廷訓練基地循例切吓蛋糕，大家嘻嘻哈哈咁影吓相，但表面風光，實際球隊成績咁差，個個都變躁底。球員間就係咪應該即炒領隊森柏奧利呢個問題上，引起好大爭議。據阿根廷一個足球網站報道，前競賽會、聖羅倫素球員林巴迪爆料，早前班國腳有一晚開會，商量係咪踢走森柏奧利，同埋要求搵貝魯齊加接手，由另一位前國腳盧基利做佢助手，大家意見紛紜，結果愈講愈有火藥味，馬斯真蘭奴同基斯甸柏禾仲嘈起上嚟，互相「問候」對方長輩，句句都包含性器官，終於基斯甸柏禾醒咗馬斯真蘭奴一巴，兩人隨即埋牙，拳腳交加，要勞動隊友拉開。

球隊目前情況混亂，光頭領隊森柏奧利雖然冇即炒，但實際權力已被架空。目前阿根廷基本上由前國腳、現任球隊總經理貝魯齊加及幾位主力球員掌控。1986年冠軍功臣吉斯迪向這位前隊友查探過，隊方表示對尼日利亞嘅出場陣容，將由球員自行決定。吉斯迪咁講：「森柏奧利對尼日利亞可以喺後備席出現，如果佢唔想現身都冇問題。」

一個正常嘅美斯係咪可以救全家，渡邊年都存在疑問，更何況已經冇晒Heart嘅美斯，睇佢頭兩場表現頭耷耷，冇厘隊長風範，其他人點配合都冇用。

相反，尼日利亞上仗喺換邊前被冰島圍攻，捱至下半場以突襲得手，最終贏2比0，尼日利亞球員單打獨鬥嘅能力唔差得過阿根廷，水準不俗，特別值得留意嘅係，對冰島射入兩球嘅前鋒阿密特穆沙，喺上屆世界盃對住阿根廷同樣連入兩球，對住阿根廷絕對唔會怯場。由於另一場克羅地亞好大可能派晒副選上陣益冰島，尼日利亞想出線，最好都係贏波，下盤固然可取，鍾意扒冷嘅不妨小注6.25倍主W。

●渡邊年

Follow東網體育IG一齊撐本地運動員！

http://bit.ly/2EYxoRh　

東網體育FB同你追實體壇每個精彩時刻！

http://bit.ly/2ecTF2A