【不斷更新】補時完畢 葡萄牙出局
20180701
東網電視
更多新聞短片
（Getty Images）
即上彩報世盃專頁：http://win.on.cc/football/cup2018/
【03:56】補時結束，烏拉圭以2比1擊敗葡萄牙，殺入8強對法國。
【03:49】90分鐘踢完，球證補時4分鐘，烏拉圭仍以2比1領先葡萄牙。
【03:35】
76分鐘，葡軍古里路禁區外左腳勁抽，唔中龍
【03:30】
卡雲尼受傷離場，C朗識英雄重英雄扶佢離開
【03:29】
70分鐘，梅斯利拿派膠，貝拿度施華一腳抽高，嘥晒！
【03:24】
65分鐘，葡軍造波造到八碼點，C朗諗住爆網之際，托拉拿一腳解圍
【03:21】
61分鐘，烏拉圭快速反擊，卡雲尼於左路起右腳彎遠柱入網，又試領先！
【03:14】葡萄牙 1:1 烏拉圭
55分鐘，葡軍左路斬中，比比泰山壓頂頂入，1:1！
【03:10】
52分鐘，葡軍拉菲爾古里路窩利遠射，僅僅高出
【02:47】【半場完】葡萄牙 0:1 烏拉圭
葡萄牙大戰烏拉圭，烏拉圭於分組賽以戰養戰，到16強大打真軍，阿蘇同卡雲尼如狼似虎，開波冇耐就由阿蘇左面出靚波，卡雲尼近門鑿入領先。烏拉圭領先後大打「馬體會式」足球，後防密不透風，C朗被嚴密防守下只能於禁區外起腳一次，而佢主射罰球亦唔過人牆，半場葡軍落後1球，C朗下半場有冇計呢？
【02:47】
高甸於後場大腳解圍，卡雲尼於左路底線控低跟手抽射，唔中龍
【02:38】
37分鐘，葡萄牙干卡路古亞迪斯接應右路傳中頭槌攻門，唔中龍
【02:32】
C朗主射罰球中人牆，烏拉圭守衞倒掛解圍
【02:23】
22分鐘，阿蘇射廿碼罰球，葡軍門將打橫撲走
【02:14】
阿蘇殺入禁區窄位抽射，博到角球
【02:11】
荷西方迪近門衝頂，柱邊出界
【02:07】葡萄牙 0:1 烏拉圭
烏拉圭左路斬中，卡雲尼近門嚟個顏面撞入，領先1:0！
【02:06】
C朗起腳！禁區外遠射中龍，但畀門將沒收
【02:00】
開波喇，2分鐘葡萄牙就有機會，祖奧馬里奧左路斬中，貝拿度施華頂遠柱高出
【01:10】葡萄牙對烏拉圭陣已出，雙方都以最強陣容應戰，究竟C朗勁啲定係阿蘇加卡雲尼犀利啲，好快就有答案！
葡萄牙正選陣容
1魯爾柏迪斯奧
15列卡度巴布沙 3比比 6荷西方迪 5拉菲爾古里路
11貝拿度施華 23艾迪恩施華 14威廉卡維奴 10祖奧馬里奧
17干卡路古亞迪斯 7基斯坦奴朗拿度
烏拉圭正選陣容
1梅斯利拿
22馬田卡沙利斯 2荷西基文尼斯 3高甸 17迪亞高拿索特
8蘭迪斯 14盧卡斯托拉拿 6賓坦古亞 15馬泰斯雲仙奴
9蘇亞雷斯 21卡雲尼
【全場完】法國最終以4:3擊敗阿根廷，雙方今場鬥攻，互有領先，最大分野係法國攻擊點夠多，而且年輕力壯，淨係一個基利安麥巴比已經用速度玩殘阿根廷防線。阿根廷靠晒美斯，獨力難支，輸波都無話可說。
【23:50】法國 4:3 阿根廷
92分鐘，阿古路為阿根廷追番1球，但已經太遲。
【23:42】法國 4:2 阿根廷
84分鐘，美斯殺入禁區，但焗用唔擅長嘅右腳射門，冇力度被門將接實。
【23:41】法國 4:2 阿根廷
83分鐘，法國換走基沙文，由費基亞入替。
【23:26】法國 4:2 阿根廷
68分鐘，法國中場兩腳波過晒阿根廷後防，麥巴比禁區右輔位抽入，4:2！
【23:22】法國 3:2 阿根廷
64分鐘，麥巴比禁區快速一扣壓前，即時起左腳搞掂，法國反超前呀！
【23:15】法國 2:2 阿根廷
57分鐘，班捷文柏華特接應左路傳送，禁區外腳趾尾拉西搞掂，2:2呀！
【23:14】
56分鐘，法斯奧派膠回後門將，基沙文偷到位一射，可惜柱邊出界，阿根廷有運呀喂！
【23:07】法國 1:2 阿根廷
48分鐘，阿根廷左路罰球斬中，混亂間美斯左腳一射，個波省中加比爾馬卡度彈入，阿根廷反先2:1！
【23:03】
下半場開波，阿根廷法斯奧換入，盧祖換走
【22:47】【上半場完】法國 1:1 阿根廷
美斯今仗擺右路，但上半場雖然踢得落力，不過實際表現麻麻，掂波機會唔多，因法國防守力一流，令阿根廷連組織都有困難，上半場冇咩機會創造到出嚟。法國縮後多少專心打反擊，淨係一個基利安麥巴比已經搞到阿根廷疲於奔命，佢一個幾乎跑贏晒成條阿根廷防線，佢三次被侵犯，第一次基沙文射罰球中楣，第二次獲判12碼基沙文射入，第三次普巴射罰唔中。阿根廷冇咩計，唯有靠個人能力，完半場前迪馬利亞一個靚遠射追平完半場。雖然目前打和，但阿根廷查實仍比較被動，下半場要睇吓「美斯領隊」有乜計喇。
【22:41】法國 1:1 阿根廷
41分鐘，迪馬利亞禁區頂左腳勁射靚波入網追平！
【22:30】
30分鐘，麥巴比又殺入禁區，好彩達利亞費高截到個波，唔係輸咁九成
【22:27】
27分鐘，加比爾馬卡度殺入禁區出波，個波掂到法國守衞隻手，但球證冇畀12碼
【22:20】
麥巴比屈速又被侵犯，阿根廷又輸禁區外罰球，普巴主射罰球一飛沖天
【22:13】法國 1:0 阿根廷
麥巴比畀盧祖於禁區內侵犯，球證畀12碼，基沙文主射搞掂，法國領先1:0！
【22:08】馬斯真蘭奴踢跌基利安麥巴比，法國禁區頂獲得罰球，基沙文主射中楣彈出。
【22:00】比賽正式開始。
世界盃16強今晚(30日)10點開波，頭炮立即上演重頭戲，法國對阿根廷。1998年冠軍法國近年人才輩出，有統計指佢哋今次23人大軍總身價達到11億歐元(約100億港元)，成為今屆最貴球隊。
阿根廷喺球王美斯帶領下，幾經辛苦先至晉級16強，難免被睇低一線。不過，話晒佢哋曾於1978及1986年捧世界盃，上屆亦打入決賽，加上美斯經常扮演救世主，創下奇迹，絕對唔嘢小。
值得一提，阿根廷歷來3次於6月30日踢世界盃，都要以互射12碼分勝負，包括1990年8強，同南斯拉夫打和0:0，互射12碼阿根廷贏3:2。1998年16強，阿根廷同英格蘭打和2:2，又要互射12碼，阿根廷贏4:3。2006年8強，阿根廷同德國打和1:1，呢次互射12碼，阿根廷輸2:4。
今次又係6月30日踢，阿根廷同法國隨時要踢足120分鐘，以互射12碼分勝負，球迷們準備捱夜。
法國正選陣容(433)
1洛里斯
2班捷文柏華特 4華拉尼 5烏姆迪迪 21盧卡斯靴南迪斯
14馬度迪 13尼高路簡迪 6保羅普巴
10基利安麥巴比 9基奧特 7基沙文
阿根廷正選陣容(433)
12法蘭高艾馬尼
2加比爾馬卡度 17奧達文迪 16馬高斯盧祖 3達利亞費高
15安素佩雷斯 14馬斯真蘭奴 7班尼加
22基斯甸柏禾 10美斯 11迪馬利亞
東網體育FB同你追實體壇每個精彩時刻！
Follow東網體育IG一齊撐本地運動員！