【天亡巴西】寸人寸得太早！尼馬唔止輸場波

東網電視

尼馬畀古亞達度(圓圖)寸番轉頭。(美聯社圖片)

巴西喺俄羅斯世盃8強以1:2不敵比利時，尼馬整個賽事得2個入球同1次助攻收工，仲因為經常插水詐死碌地，形象大跌，而且佢喺16強賽後，曾經寸對手墨西哥已經返屋企，結果到佢執包袱，即刻畀墨西哥隊長古亞達度補刀恥笑。

尼馬喺巴西淘汰墨西哥嘅16強賽事，畀拿恩踩中嘅時候發揮演技瘋狂碌地，賽後佢話，墨西哥搵人踩佢都冇用，始終要返屋企，依家到佢走人，古亞達度喺Instagram留言：「依家到邊個返屋企呢？」佢仲加咗3個疑問抵死表情，寸番尼馬轉頭。

雖然尼馬對住比利時，已經收歛咗冇無限插水，嘗試專心踢波，但網民始終覺得，如果唔係佢之前詐死太多，搞到球證唔信佢，巴西對比利時點都應該有12碼，而且今次巴西出局，其實尼馬唔止輸場波咁簡單。

事實上，尼馬幫唔到巴西重奪世盃，意味佢錯過爭贏C朗同美斯，登上世界足球先生寶座嘅最好機會，同時佢嘅浮誇演技令好多人反感，皇家馬德里係咪會堅持用天文數字轉會費撬佢過檔，變成未知數，呢場敗仗隨時成為佢足球生命轉捩點。

Follow東網體育IG一齊撐本地運動員！

東網體育FB同你追實體壇每個精彩時刻！

on.cc東網