英格蘭雙蛋贈瑞典相隔28年再闖4強

東網電視

(Getty Images)

港人至愛英格蘭又贏！周六晚上演的世界盃8強瑞典對英格蘭，戰況意想不到咁激烈，雖然哈利卡尼未有建樹，但英格蘭仍以2比0贏波，繼1990年意大利世界盃之後，相隔28年再度殺入4強，距離捧盃又近一步！

英格蘭沿用16強淘汰哥倫比亞嘅原班人腳出戰，至於瑞典就有刑滿嘅施巴斯坦拿臣復任正選，停賽嘅右閘路斯迪就由艾美卡夫頂替。賽事初段瑞典攻勢較多，中場域陀卡里臣遠射高出，為這場激戰揭開序幕。

上半場中段英軍開始全軍壓上，史達寧在前線表現活躍，可惜處理埋門一腳未夠火候，其中一次右路快放一段，橫傳畀哈利卡尼於禁區邊快射，僅僅斜出，其後史達寧再於右路發難，斬波省中於禁區內嘅科斯貝治隻手，但因冇乜動作，球證冇判12碼。

30分鐘英格蘭終於打破缺口，艾舒利楊格進攻左路開出角球，助攻嘅後衞哈利馬古尼12碼點勁頂破網，英格蘭領先1:0。完半場前史達寧有個擴大比數機會，可惜這位曼城前鋒單刀埋門過唔到瑞典門將羅賓奧臣，再射又省中對方守將出底線。

下半場再開瑞典狂攻，其中馬古斯貝治頭槌最有威脅，但被三獅門將比克福特飛身救出，不過英軍好快就反壓對手，更於59分鐘擴大比數，連格於右路斬去遠柱，冇人看管嘅迪利阿里頂成2:0。

瑞典落後兩球下豁出去，域陀卡里臣及馬古斯貝治勁射又被比克福特神勇救出，最終英格蘭以2比0贏波，躋身世界盃4強。

東網體育FB同你追實體壇每個精彩時刻！

Follow東網體育IG一齊撐本地運動員！

on.cc東網

英格蘭雙蛋贈瑞典 相隔28年再闖4強