狂牛有着落　前巴塞主帥安歷基任新領隊

即上彩報世盃專頁：http://win.on.cc/football/cup2018/　

西班牙國家隊人事大洗牌，繼較早時間宣佈由執教過港超傑志嘅摩連拿做體育總監之後，西班牙足總隨即亦宣佈國家隊新帥人選，由前巴塞隆拿主帥安歷基出任，頂替啱啱離隊嘅希亞路，嚟緊將會帶領喺2018世盃16強遭淘汰嘅西班牙，備戰2020年歐國盃。

安歷基今次擊敗多位競爭者，包括前馬拉加主帥米高同前愛斯賓奴教頭科里斯，博得足總主席魯拜利斯歡心，成為「狂牛軍團」揸弗人。過去曾經喺羅馬、切爾達同巴塞隆拿都教過波嘅安歷基，相信最為人熟知嘅執教經歷，肯定係帶領巴塞喺2014-15賽季取得3冠王佳績。佢自從2017年夏天離任巴塞主帥一職之後，就一直賦閑，今次喺狂牛啱啱經歷令人失望嘅世盃征途之後，成為新嘅掌托人，安歷基為帶領西班牙重回正軌，如無意外將會面對重大挑戰。

安歷基首場正式領軍比賽，會喺9月初新舉辦嘅歐洲國家聯賽，作客鬥英格蘭。

東網體育FB同你追實體壇每個精彩時刻！