舊戰友變新對手　迪甘斯遇亨利話好古怪

即上彩報世盃專頁：http://win.on.cc/football/cup2018/　

法國嚟緊將會喺4強火併比利時，法國領隊迪甘斯亦將會遇上一個熟悉面孔，就係依家身為比利時助教嘅前國家隊隊友亨利。想當年1998年，法國喺主場贏得世界盃冠軍，迪甘斯就係法國隊長，亨利就係陣內新晉前鋒，兩大奪標功臣亦師亦友，今次以對手身份碰頭，難怪迪甘斯都話感覺怪異。

迪甘斯出任法國領隊6年，而亨利則係喺2016年上任比利時助教，今次狹路相逢，迪甘斯話：「感覺真係好奇怪，佢（亨利）明明係個法國人，但反而喺對手後備席。不過無論如何，佢係一個我好欣賞嘅人，我都為佢感到高興。」

嚴格嚟講，依家已經49歲嘅迪甘斯喺球員時代絕對係亨利前輩，二人攜手出戰1998年世界盃，迪甘斯已經係隊長，至於當年僅得21歲嘅亨利，雖然當屆以3個入波成為法國隊內神射手，但喺決賽贏巴西場波，亨利則未有份披甲。不過，之後亨利就成為咗法國傳奇，累積射入51球成為法國隊史神射手，123次披甲則係法國史上第二多，同時亨利仲踢過02、06同10世界盃，球員成就甚至超越迪甘斯添！

值得一提，亨利同比利時嘅助教合約，會喺今屆賽事之後完結，或者第時有機會，可能亨利會成為法國教練團一員呢！

東網體育同你追實體壇每個精彩時刻！　

https://goo.gl/ewVpvE