唔入波又點？麥巴比貢獻世盃最靚「助攻」
20180711
東網電視
更多新聞短片
（互聯網）
即上彩報世盃專頁：http://win.on.cc/football/cup2018/
法國前鋒基利安麥巴比，於世界盃16強用閃電速度及梅開二度，向全球球迷介紹自己；去到四強對比利時，呢名19歲射手雖然冇入波斬獲，但佢卻做出個極其悅目、極富娛樂性、又靈氣十足嘅超靚助攻，迅間撕開比利時堅韌防守。雖然基奧特唔爭氣最後射唔入，但絕對係本屆世盃最靚「助攻」。
今仗麥巴比冇乜機會射門，但上、下半場都有靚妙傳。上半場佢於右路搞搞震，彈畀右閘班捷文柏華特，後者殺入禁區窄角度勁射好有威脅，但過唔到比利時門將泰拔高圖爾斯。
換邊後上演正本戲，當時法國左路發動攻勢，皮球傳予麥巴比，呢名巴黎聖日耳門中鋒背對龍門，佢右腳一攞後即刻左腳一個後踭交前，好似有後眼咁交到入楔嘅基奧特腳下。當時正防守緊麥巴比嘅，係比利時隊長高柏尼，佢冇失位、全程牛咁眼睇到實，但就成為最接近嘅觀眾，眼白白睇住呢個小將撕開防線。麥巴比速度、把握力、腳法、技術、閱讀球賽能力都一流，勁到難以形容。
東網體育FB同你追實體壇每個精彩時刻！