英格蘭加時反敗　克羅地亞首入世盃決賽

It's coming home？今次仲未得住，欠缺經驗嘅英格蘭世界盃四強止步。三獅兵團大戰克羅地亞，開賽5分鐘已憑捷比亞射入靚罰球領先，但之後哈利卡尼、連格未能拉開比數，就種下反敗禍根，換邊後比列錫為克軍扳平後，英軍後防輪換派膠，90分鐘唔輸算夠運。去到加時階段英軍被救空門後，加時下半場文迪蘇傑近門左腳抽入反勝2:1，克羅地亞歷史上首次殺入決賽，會同法國爭冠軍。

上半場雙方快打快戰情可觀，英格蘭開波5分鐘就開紀錄，查比亞彎入蘇巴錫左手面網窩，三獅好快領先。克軍之後大舉反擊，頻頻於禁區頂發炮，其中列比錫多次起腳，雖然搞到史東斯、哈利馬古尼好頻能，但門將比克福特續有出色表現，幫英軍頂住。三獅企穩陣腳後，不斷利用史達寧速度進襲對手，打到後段連格曾有機會於禁區頂空晒埋門，但竟然龍都唔中，未能拉開比數。完半場前英軍一條後防線畀人一逼，馬古尼交波犯錯幾乎畀人單刀，半場英軍領先1粒。

換邊後英格蘭依然受壓，多番兩邊出波令英格蘭疲於奔命，63分鐘比列錫禁區頂狂抽，射正獲加下體被閂出，但到68分鐘克軍終於扳平，球隊右路都個靚波，比列錫楔贏獲加跳起左腳撐入網，追成1:1。之後克羅地亞得勢不饒人，趁史東斯解圍派膠，比列錫壓入禁區勁射中柱，列比錫再射畀比克福特接住，英軍唔輸夠運。之後英格蘭後防亂晒大籠，史東斯、獲加先後派膠，畀克軍大把機會起腳，但文迪蘇傑射門被擋，比列錫起腳又僅高出。英軍換走史達寧換入拉舒福特，福仔完場前博到罰球，罰球斬入卡尼門前一頂唔中龍，90分鐘打和1:1，比賽進入加時階段。

加時9分鐘，英軍企定陣腳後有番攻勢，右路角球斬出史東斯勁頂睇怕入硬，但畀禾沙積高救空門。完加時上半場前，文迪蘇傑撞射畀比克福特用腳救到。換邊後克軍角球地波畀到波索域起腳，可惜唔中龍。109分鐘英軍解圍唔遠，文迪蘇傑接應隊友頭槌入楔，快腳射遠柱入網，克軍反先2比1。英軍雖然之後換入占美華迪，但都係追唔番，120分鐘輸1:2，只能同比利時爭季軍。