【克幕】莫迪歷捲貪腐案　克國球迷恨之入骨

即上彩報世盃專頁：http://win.on.cc/football/cup2018/　

克羅地亞歷史性殺入世界盃決賽，「魔笛」莫迪歷受到全球球迷追捧，不過令人意外嘅係，克羅地亞國內有相當大部份嘅球迷，完全唔Like呢位球星，更視莫迪歷為國家罪人！點解？因為莫迪歷捲入咗克羅地亞球壇史上最大型嘅貪腐案，更被指控庭上「做假證供」包庇貪官，隨時面臨5年監禁！

莫迪歷喺國內嘅負面形象，最大原因係佢同「貪腐魔頭」馬米關係密切。做過薩格勒布戴拿模副主席同克羅地亞足總副會長嘅馬米，喺當地球壇可以話係隻手遮天。2015年，馬米被控貪污、逃稅及侵佔罪，莫迪歷等多位國腳都被傳召上庭，全國球迷都希望可以將馬米繩之於法，勢估唔到莫迪歷竟然作出令球迷O咀嘅證供。

疑似包庇馬米嘅莫迪歷，喺法庭上大玩失憶，對於自己喺薩格勒布戴拿模嘅人工、轉會分帳、國家隊首演時間等問題，通通都以「唔記得」作回應。最關鍵係，莫迪歷庭上突然改口供，指佢同馬米就轉會熱刺嘅合約，並非供詞所講嘅「事後簽署」(即係並非違法)，明顯要放生馬米。

不過，馬米今年3月仍被判罪名成立，要監禁6年半，只係馬米已經走佬去到波斯尼亞，無意返克羅地亞服刑。可憐莫迪歷就成為眾矢之的，佢家鄉四處都有攻擊佢嘅塗鴉，細個走難嘅舊居亦被掛上抗議橫額，決賽周前更加被檢察官控告畀假證供，一旦罪成會面臨5年監禁。莫迪歷如果可以帶領克羅地亞捧盃，或者可以扭轉民心，用冠軍為自己贖罪。

東網體育FB同你追實體壇每！個精彩時刻！

http://bit.ly/2ecTF2A