C朗新波衫1分鐘賣1件 首件簽名版炒至10萬

20180712
東網電視
更多新聞短片
買到波衫啦!(法新社)
即上彩報世盃專頁:http://win.on.cc/football/cup2018/ 
啱啱由皇家馬德里強勢加盟祖雲達斯嘅葡萄牙球星C朗,因為呢次轉會再次成為全球焦點,其中喺意大利當地就掀起波衫搶購熱潮。據《米蘭體育報》報道,喺C朗確認轉投「老婦人」之後,大批球迷去到位於米蘭嘅祖記專門店排晒長龍,為嘅就係希望買到C朗波衫。
據呢家專門店店長表示,佢哋平均每1分鐘,就可以賣到一件C朗嘅祖記7號波衫,可見呢位葡萄牙球星人氣就幾勁。但係對於熱血FANS嚟講,簡單一件7號波衫又點夠猴,梗係會想搶到件有佢親筆簽名嘅波衫先夠爽,不過呢件球衣,最終仲令唔少人捲入一場大龍鳳。
話説Sportitalia電視台主管喺知悉C朗正喺希臘度假嘅消息之後,就即刻派記者去到當地,希望可以爭取攞到C朗加盟祖記嘅第一件簽名波衫。呢位記者去到只係買到「老婦人」上季嗰件球衣,而且仲畀保安人員阻擾,唔畀記者接近C朗,惟有揾一位可以見到C朗嘅遊客,完成呢項任務,最終嗰名遊客又真係攞到簽名。
不過呢位遊客冇交返件簽名波衫畀記者,而係將件衫擺咗上網拍賣,現時叫價已經去到1.3萬歐元(約10萬港元)。咁樣畀人順手牽羊,電視台主管梗係唔制,仲話肯定會控告嗰位遊客。
東網體育FB同你追實體壇每個精彩時刻!