【決賽大迷信】為求好運 球員各有絕招
20180713
東網電視
更多新聞短片
(互聯網)
即上彩報世盃專頁：http://win.on.cc/football/cup2018/
其實除咗法國隊，每個球員都想有幸運之神眷顧，其他球員又會做啲咩呢？
C朗拿度「羊咩鬚」勁醒神
葡萄牙巨星C朗拿度今屆世盃決賽周第1場就上演帽子戲法，兩場入足4球，相信大家都好記得佢摸住「羊咩鬚」慶祝個得戚樣喇，佢之後解釋：「我同哥利斯馬講，如果今場入波就繼續留羊咩鬚直至世界盃完結。所以我入波之後就摸住下巴，羊咩鬚帶畀我幸運，所以會繼續留。」佢嘅葡萄牙隊友薛迪索拉斯都好認同，仲話最好成隊都留晒呢個幸運鬚：「希望C朗唔好剃咗佢啦！」
馬納當拿錫美斯波衫給力
美斯除咗留鬚之外都冇乜特別迷信嘢，反而前輩馬納當拿就好「神心」！阿根廷對克羅地亞賽前，馬納當拿拎住美斯件波衫深深一吻祝福佢，點知阿根廷最後輸3蛋，呢個原來係「死亡之吻」喎……
迪利阿里一對Pad著足11年
英格蘭中場迪利阿里有對「文物級」護脛：「我呢對Pad跟咗我11年喇，11歲就開始用，冇洗過，但唔知點解唔臭㗎喎！我試過唔見咗呢對嘢成6個月，一用其他護脛，就踢得好差，所以一搵番我就開心到飛起！」不過呢對「幸運Pad」似乎冇咩用，事關佢第一場對突尼西亞就受傷，分組賽最後一場對比利時一戰都只係坐後備席。
馬些路入球場一定要右腳行先
巴西守衞馬些路堅持入球場時，一定要右腳行先。早前有記者發現佢喺羅斯托夫訓練時，行入球場後又立即走出球場，原來佢不慎以左腳先走進球場。馬些路笑言：「個個都鍾意右腳行先㗎啦，冇咩咁特別！」
馬里奧高美斯去廁所要揀最左
德國前鋒馬里奧高美斯就絕對係一個「左派人」，行入球場要左腳行先，連去廁所都要去最左嗰個！呢位球星話：「我啲隊友都會問我係咪有咩問題，但我去廁所其實冇特別諗要揀最左嗰個，基本上自動就會行埋去。」
泰拔高圖爾斯唱國歌必摸下巴
每次賽前唱國歌時，比利時門將泰拔高圖爾斯一定會摸一摸下巴。比利時分組賽全勝，睇嚟呢招都唔錯喎！
東網體育FB同你追實體壇每個精彩時刻！
Follow東網體育IG一齊撐本地運動員！