【金球激鬥】史上最亂!簡迪強戰魔笛麥巴比

2018年07月13日 19:00
東網電視
更多新聞短片

即上彩報世盃專頁:http://win.on.cc/football/cup2018/

2018世盃仲淨番季軍戰同決賽要踢,最終冠軍誰屬好快就知!至於其餘個人獎項如金靴獎,普遍認為已成英格蘭射手哈利卡尼囊中物,金手套就預計會係法國洛里斯同克羅地亞蘇巴錫之爭。反而金球獎就最難估,法國超新星基利安麥巴比夠搶鏡被外國博彩公司列為大熱,但克羅地亞中場重心「魔笛」莫迪歷亦來勢洶洶,不過,連日嚟唔少外地媒體齊齊全力吹捧法國無名英雄防中尼高路簡迪,話唔定一眾有識波牌嘅世盃評委最後揀佢,肯定會令球迷大跌眼鏡!

被英國博彩公司William Hill列為1.91倍大熱嘅法國小將基利安麥巴比,今屆最搶鏡一役肯定係對阿根廷,除咗有球跑足半場搏得12碼,仲有為球隊射入埋齋兩球成為贏波功臣,最令球迷留下深刻印象。再加上佢對秘魯都有入波,能夠成為熱門合理,只係佢喺8強同4強之戰都未算有主宰性發揮,要贏金球獎,都必須要喺決賽有貨交。

至於畀William Hill大幅由8倍下調到得3倍次熱嘅克羅地亞中場莫迪歷,雖然喺今屆賽事僅入2球,但無論攻守兩端都總會見到佢身影。最重要一點,係「魔笛」喺「格仔兵團」連續3場打到去加時戰、甚至互射12碼階段,都持續保持高水準發揮,相信只要克羅地亞最終能夠封王,金球獎極有機會落入佢手中。

不過,講到最有能力打破呢個「二龍爭珠」局面,則非法國防中尼高路簡迪莫屬。多個外地媒體連日嚟都為呢位車路士中場造勢,大事讚好佢非凡功用,直指佢係法國晉身決賽嘅第一功臣。事實上,被William Hill列為13倍半冷嘅尼高路簡迪,於中場線近乎無處不在嘅防守,往往令對手難以組織具威脅攻勢。此外,佢喺協助球隊轉守為攻,亦起住極為重要作用,有數據顯示,簡迪喺對烏拉圭嘅8強賽事,便曾連續作出34次傳送而未有失誤,而喺對烏拉圭同阿根廷兩場賽事嘅下半場,呢個被隊友保羅普巴稱為「15肺」嘅防中,更加未有失過一次控球權。

所以話論表現,身高只得1米68嘅尼高路簡迪,甚至畀麥巴比同「魔笛」都可能係更出色,只係一向數據不會太搶鏡嘅防中位置球員,素來同世盃金球獎無緣,且看今屆簡迪有冇機會打破傳統,爆冷得獎!


Follow東網體育IG一齊撐本地運動員!
http://bit.ly/2EYxoRh

東網體育FB同你追實體壇每個精彩時刻!
http://bit.ly/2ecTF2A