【金球激鬥】施丹最經典！科蘭簡尼破慣例

世盃金球獎係頒畀賽事最佳球員，不過睇番近5屆，竟然都唔係由冠軍球隊隊員取得，最近一個冠軍嘅金球獎得主，已經要數到94年巴西射手羅馬里奧。至於2010年南非世盃，嗰屆得獎者正係今年嚟咗港超聯傑志效力嘅烏拉圭巨星科蘭，當年佢支烏拉圭只係攞第4添，證明要贏金球獎，都真係好睇個人對球隊影響力，而並非單純喺冠軍隊揀選。

要數近屆其中一個經典，必定係06年德國世盃嘅金球獎得主施丹。嗰年施丹嘅法國喺決賽互射12碼不敵意大利，輸咗個冠軍，施丹仲要喺加時用「施丹頭槌」頂向對手守將馬特拉斯心口，被逐出場。雖然事件極惹爭議，但依然無損施丹完美表現畀評委留下嘅好印象，最終照頒金球獎畀佢，點到你唔服。

此外，2002年日韓世界盃，當屆決賽由巴西以2比0淨勝德國，不過金球獎係落喺德國門將「大猩猩」簡尼手上。查實要數近代金球獎得主，基本上絕大部份都係中前場主打進攻球員，因此呢年由門將取得，亦係打破常規。要知道就算06年世界足球先生由簡拿華路取得，但世盃金球獎都係輸畀施丹，就知道防守球員要贏世盃金球真係勁難，因此簡尼嘅成就，亦係值得大家佩服。