【季軍戰】比利時鬥英格蘭 魔獸幼獅搶金靴

即上彩報世盃專頁：http://win.on.cc/football/cup2018/　

世盃季軍戰，兩支4強輸波球隊比利時同「三獅兵」英格蘭，將會繼小組賽之後再次碰頭。呢場除咗係第3名之爭，仲係兩位前鋒「9號仔」哈利卡尼同「新魔獸」盧卡古爭奪今屆金靴獎嘅關鍵一戰，兩人無緣爭冠心都碎晒，為贏得呢項殊榮，進攻意欲肯定強，成為今場最大焦點。（Now 616及618周六晚10時直播）

大打進攻足球嘅「歐洲紅魔」比利時，絕對係今屆32強分子之中，踢法最具娛樂性嘅一隊。佢哋喺16強面對日本落後兩球，最終上演熱血反擊，連追3球反勝3比2，跟住再喺8強以2比1擊敗傳統勁旅巴西，可惜4強受制於法國銅牆鐵壁，最終輸0比1要轉戰季軍戰。

盧卡古射手榜喪追哈神

比利時今屆決賽周至今6場轟入14球，火力強勁，奇雲迪布尼、夏薩特及盧卡古等一班進攻天才，個個都有進帳，尤其箭頭人物盧卡古，無論拉邊或者喺中路強行突破，威力都十分驚人，至今個人已經斬獲4球及1助攻，只落後帶頭嘅「哈神」哈利卡尼2球，呢場絕對仲有得追，為攞神射手肯定搏命。

另一邊廂，以年輕球員為骨幹嘅「三獅兵團」英格蘭，上仗4強領先克羅地亞後，一班小將明顯怯場，未能擴大優勢之餘，仲畀對手反勝，最終同決賽擦身而過實在可惜。不過英格蘭前場進攻好手，包括史達寧同連格，質素絕對唔差，上仗多次畀到對方後防威脅，去到季軍戰無咗心理包袱，相信可以交出最佳表現，全力支援至今已經射入6球嘅哈利卡尼，鞏固佢嘅神射手優勢。

值得留意，「三獅兵團」中場佐敦軒達臣、後衞捷比亞同基爾獲加都有傷上陣成疑，冇咗呢幾位中後場主力，英格蘭防守隨時有隱憂，失波絕對唔奇。況且歷來世盃季軍戰經常上演入球騷，自1978年開始，近10屆季軍戰全開3球或以上，呢場有兩大射手力爭世盃神射手，入波肯定唔會少。

東網體育FB同你追實體壇每個精彩時刻！

http://bit.ly/2ecTF2A　

Follow東網體育IG一齊撐本地運動員！

http://bit.ly/2EYxoRh