【法國寶藏】盧卡斯靴南迪斯狂牛基因大爆發

2018年07月14日 08:15
東網電視
更多新聞短片

即上彩報世盃專頁:http://win.on.cc/football/cup2018/ 

「狂牛心、雄雞身」!法國今屆勇闖決賽,其中一位無名英雄,肯定係踢足6場正選嘅左閘盧卡斯靴南迪斯。呢位22歲新星能夠企喺決賽舞台爭逐冠軍,勢估唔到要多謝西班牙,事關佢除咗出自西甲勁旅馬德里體育會青訓,然後再喺「床單軍」打響名堂,更重要係一直決意入籍西班牙嘅佢,喺時任西班牙足總體育總監嘅希亞路「幫忙」下,最後棄「牛」從「雞」,回歸「高盧雄雞」懷抱,意外成為法國今屆取得佳績重要一員。

老竇法蘭哥斯靴南迪斯係曾效力馬體會嘅職業球員,細佬迪奧靴南迪斯家陣係皇家馬德里正選,至於盧卡斯靴南迪斯則係家族之光,由今年3月首度入選法國國家隊至今,成功企穩正選到決賽,你點可以唔識佢?

喺馬賽出生,但4歲就跟隨老竇移居西班牙,盧卡斯喺11歲就加入馬體會青訓,之後一帆風順,到2014年開始代表馬體會一隊上陣,依家更係球隊必然正選。盧卡斯過去曾代表法國唔同年齡代表隊,但到近年表現提升,竟然意外得到西班牙國家隊前主帥洛佩特吉垂青,不過喺希亞路主動向國際足協(FIFA)查詢了解「轉籍」可能後,卻收到FIFA回覆,曾代表法國出戰歐青賽嘅佢,根本只能取得法國國籍,若然勉強代表西班牙出賽,只會受罰,最終逼令「狂牛兵團」放棄徵召呢位防線新星,而畀機會法國領隊迪甘斯冷手執個熱煎堆。

雖然間中仲會被批評擅守不擅攻,不過盧卡斯靴南迪斯已經憑穩健防守喺世盃打響名堂,「高盧雄雞」今次執到寶,捧盃後記得去多謝希亞路同西班牙先好呀!

東網體育同你追實體壇每個精彩時刻! 
https://goo.gl/ewVpvE